ठाण्यात रिक्षाची दुभाजकाला धडक

लोकमत न्यूज नेटवर्क

ठाणे : चालकाचे नियंत्रण सुटल्याने रिक्षाची दुभाजकाला धडक बसल्याने रिक्षा चालकासह रिक्षातील रेहमत शेख (५७) आणि यास्मीन (३१) हे जखमी झाल्याची घटना नुकतीच घडली. याप्रकरणी अनोळखी रिक्षाचालकाविरुद्ध नौपाडा पोलीस ठाण्यात गुन्हा दाखल झाला आहे.

मुलुंड येथील रेहमत आणि यास्मीन हे मुलुंड येथून राबोडीकडे ८ सप्टेंबरच्या रात्री ८.४५ च्या सुमारास जात होते. त्याचवेळी रिक्षाचालकाचा वेग जास्त असल्याने दोघांनी रिक्षा सावकाश चालवा, असेही या चालकाला बजावले. तरीही त्याने त्यांच्या बोलण्याकडे दुर्लक्ष करीत रिक्षा भरधाव नेली. रिक्षा तीन पेट्रोलपंप येथे आली असता, चालकाचे नियंत्रण सुटल्याने रिक्षाची दुभाजकाला जोरदार धडक बसली. यात रिक्षा उलटल्याने रेहमत आणि यास्मीन हे दोघेही रिक्षातून खाली पडल्याने जखमी झाले. यात रिक्षा चालकही जखमी झाला. मात्र, त्याने तिथून पलायन केले. जखमींना स्थानिकांनी जवळच्याच एका खासगी रुग्णालयात दाखल केले.

दरम्यान, याप्रकरणी ९ सप्टेंबरला नौपाडा पोलीस ठाण्यात अनोळखी रिक्षा चालकाविरुद्ध गुन्हा दाखल झाल्याची माहिती नौपाडा पोलिसांनी दिली.

--------------------