बुलेटच्या धडकेने रिक्षा उलटली, रिक्षाचालक जखमी

अंबरनाथ : भरघाव जाणाऱ्या बुलेटस्वाराने रिक्षाला जोरदार धडक दिल्याने रिक्षा उलटल्याची घटना शुक्रवारी दुपारी घडली. या घटनेत रिक्षाचालक जखमी झाला आहे. मात्र, या अपघातानंतर बुलेटस्वार पळून गेला. याप्रकरणी शिवाजीनगर पोलिसांनी आरोपीविरुद्ध गुन्हा दाखल केला आहे.

पूर्वेतील कैलासनगर परिसरातील हिंदू स्मशानभूमीजवळील चौकातून भावेश भोपी (१९) हा रिक्षाचालक त्याच्या रिक्षाने उल्हासनगरच्या दिशेने जात होता. याच सुमारास लोकनगरीकडून भरघाव एक बुलेटस्वार येत होता, त्याचे गाडीवरील नियंत्रण सुटले आणि त्याने सरळ रिक्षाला धडक दिली. यामुळे रिक्षा उलटल्याने भावेश याचा उजवा पाय रिक्षाखाली दाबला गेला. घटनास्थळी असलेल्या नागरिकांनी रिक्षाला सरळ करून जखमी भावेशला बाहेर काढले.

या घटनेनंतर बुलेटस्वार पळून गेला असून शिवाजीनगर पोलीस ठाण्यात त्याच्याविरुद्ध गुन्हा दाखल झाला आहे. भावेशने दिलेल्या बुलेटच्या नंबरवरून पोलीस ठाण्यात नोंद करण्यात आली आहे. पोलीस याप्रकरणी आरोपीचा शोध घेत आहेत.

------------