‘आरपीएफ’मुळे पुन्हा घडली मुले-पालकांची भेट

लोकमत न्यूज नेटवर्क

डोंबिवली : रेल्वे सुरक्षा दलाने (आरपीएफ) मागील सात महिन्यांत मध्य रेल्वेच्या विविध स्थानकांतून ३१० मुले आणि १६७ मुली, अशा एकूण ४७७ मुलांचा शोध घेत, तर काहींची विविध ठिकाणांहून सुटका करत त्यांच्या पालकांशी पुन्हा भेट घडवून आणली. त्यासाठी चाईल्डलाईनसारख्या स्वयंसेवी संस्थांचे सहकार्य मिळाल्याचे सूत्रांनी सांगितले.

अनेक लहान मुले भांडणे किंवा काही कौटुंबिक समस्यांमुळे किंवा चांगल्या आयुष्याच्या किंवा ग्लॅमरच्या शोधात, त्यांच्या कुटुंबीयांना न कळवता रेल्वे स्थानकांवर आली होती. आरपीएफ जवानांना ते फलाटांवर, रेल्वे स्थानकांजवळ किंवा कधीकधी गाड्यांमध्येही फिरताना आढळले. आरपीएफमुळे ही मुले पुन्हा घरी परतल्याने त्यांच्या पालकांनी रेल्वेचे आणि आरपीएफचे आभार मानले आहेत.

या कामगिरीबाबत महाव्यवस्थापक अनिल कुमार लाहोटी म्हणाले की, पळून गेलेल्या मुलांशी मध्य रेल्वे संपर्क साधून, त्यांच्या समस्या समजून जाणून घेते. तसेच त्यांनी पुन्हा त्यांच्या घरी, कुटुंबासोबत जावे, यासाठी समुपदेशन करून सामाजिक जबाबदारीची भूमिका बजावते. मुले परतल्याने पालकांनी आरपीएफ आणि फ्रंटलाइन स्टाफचे कौतुक केले आहे.

जानेवारी ते जुलै २०२१ पर्यंत मुलांची केलेली सुटका

विभाग - मुले

मुंबई विभाग- १६६ मुले (१०४ मुले आणि ६२ मुली).

भुसावळ विभाग - ७० मुले (३९ मुले आणि ३१ मुली).

नागपूर विभाग - ४० मुले (२२ मुले आणि १८ मुली).

पुणे विभाग - १७१ मुले (१३० मुले आणि ४१ मुली).

सोलापूर विभाग ३० मुले (१५ मुले आणि १५ मुली).

जुलै २०२१ मध्ये ७३ मुलांची (४७ मुले आणि २६ मुली) सुटका करण्यात आली.

मॉडेलिंगसाठी पाटण्याहून गाठली मुंबई

- एका प्रकरणात २४ जुलैला कर्तव्यावरील ट्रेन तिकीट परीक्षक (टीटीई) नरेंद्र मिश्रा यांना एक १७ वर्षांची मुलगी ट्रेन क्र. ०३२१ मध्ये कल्याण आणि लोकमान्य टिळक टर्मिनसदरम्यान एकटी प्रवास करताना आढळली. लोकमान्य टिळक टर्मिनसवर पोहोचल्यावर मिश्रा यांनी तिला ड्युटीवरील महिला आरपीएफ बी. पाटीदार आणि चाईल्ड लाईन संस्थेच्या शारदा कांबळे यांच्याकडे सोपवले.

- आरपीएफ उपनिरीक्षक बबलू कुमार यांनी तिची चौकशी करताच तिने आपले नाव सांगितले. ती बिहारमधील पाटणा येथून मुंबईत मॉडेलिंग, अभिनय क्षेत्रात करिअर करण्यासाठी कोणालाही न सांगता घरातून पळून आली होती. पुढील कार्यवाहीसाठी ‘चाईल्ड लाईन’च्या कांबळे आणि महिला आरपीएफ कॉन्स्टेबल पूनम तिवारी यांनी तिला डोंगरी येथील बालसुधारगृहात पाठवले.

आईने फटकारल्याने सोडले घर

- दुसऱ्या एका घटनेत, मेहबूबनगर जिल्ह्यातील १४ वर्षांची मुलगी आईने तिला फटकारल्याने घरातून पळून विशेष ट्रेन क्र. ०६५२४ निजामुद्दीन-पुणे यशवंतपूर एक्स्प्रेसने आली होती. आरपीएफ कॉन्स्टेबल शशिकांत जाधव आणि महिला कॉन्स्टेबल पी. श्रीवास यांना ती १४ जुलैला हडपसर रेल्वे स्टेशन प्लॅटफॉर्मवर सापडली.

- चौकशी केल्यावर मुलीने तिचे नाव सांगितले. ती फक्त तेलगू बोलू शकत होती. तिने दिलेल्या नंबरवर तिच्या काकांशी संपर्क साधला. त्यानंतर, जाधव व पी. श्रीवास यांनी पुढील कार्यवाहीसाठी तिला ‘साथी’ या सामाजिक संस्थेकडे सोपविल्याचे जनसंपर्क विभागाने दिलेल्या प्रसिद्धीपत्रकात म्हटले आहे.

---------------