अजेय संस्था आयोजित "अभयारण्य - चला निसर्ग होऊ या " स्पर्धा

ठाणे : अजेय संस्था '' अभयारण्य - चला निसर्ग होऊ या '' ही स्पर्धा सध्या घेत आहे. प्रत्येक माणसाला लहानपणापासून जंगलांची प्राण्यांची ओढ असते, सुप्त आकर्षण असते. जसजसे मोठे होत जातो तसे हे आकर्षण बाजूला पडते. प्राण्यांच्या प्रजाती, त्यांची जात जिवंत असण्याची नैसर्गिक गरज, भूतदया या गोष्टींकडे दुर्लक्ष होत जाते. या सगळ्या गोष्टींबद्दलची जागरूकता पुन्हा एकदा तयार व्हावी आणि अभयारण्यांच्या जगात पुन्हा एकदा जाऊन जगता यावे, अभयारण्यातले घटक माणसाबद्दल काय विचार करत असतील याचा लेखनातून आणि सादरीकरणातून शोध घेता यावा, यासाठी अभयारण्य स्पर्धा सुरू झाली.

लेखक दिग्दर्शक डॉ. क्षितिज कुलकर्णी यांची ही संकल्पना असून गौरव संभूस निर्माता आहे. ह्या स्पर्धेचे नियोजन म्हणजेच फॉरेस्ट ऑफिसर्स कार्तिक हजारे, पल्लवी गोडबोले आचार्य, विदुला खेडकर,नलिनी पुणेरी हे करणार आहेत. यात एकूण ३५ स्पर्धकांनी सहभाग घेतला असून सहभागी स्पर्धकांनी अभयारण्यातील एक घटक निवडला आहे. उदा. प्राणी, पक्षी, नदी, डोंगर, झाडे. १४ एप्रिल आणि २१ एप्रिलला अजेय संस्थेच्या शतकोटी रसिक समूहावर दोन प्रश्न आले. या प्रश्नांवर निवडलेला घटक बनून त्याच्या दृष्टिकोनातून प्रश्नांची उत्तरे स्पर्धक देत आहेत. २५ एप्रिलला अभयारण्याची प्राथमिक फेरी शतकोटी रसिक व्हाॅट्सॲप् समूहावर संध्याकाळी ५ ते ९ या वेळात पार पडली. अभयारण्याची अंतिम फेरी १ मे रोजी फेसबुकच्या झपुर्झा पेजवर लाईव्ह होणार आहे. या स्पर्धेत २५ एप्रिलला प्राणी मित्र भूपेन कुळकर्णी ह्याने प्रेक्षकांशी पक्षी सृष्टीवर संवाद साधला आणि १ मे रोजी काही प्राणीमित्र प्रेक्षकांशी संवाद साधणार आहेत. प्रथमेश जोशी, ओंकार कदम, श्वेता कोहोजकर हे तीन प्राणी मित्र पाहुणे कार्यक्रमाला लाभले आहेत.

हा कार्यक्रम विनामूल्य आहे.

पेज लिंक - http://Fb.me/zapurza2021