बदलापूर शहर ब्लॉक काँग्रेस अध्यक्षपदी संजय जाधव

बदलापूर : बदलापूर शहर ब्लॉक काँग्रेस अध्यक्षपदी संजय जाधव यांची निवड करण्यात आली आहे. बदलापूर शहरातील मरगळलेली काँग्रेस पुनर्जीवित करण्याचा प्रयत्न जाधव यांच्या माध्यमातून करण्यात येणार आहे. बदलापूर शहरात इतर पक्षांच्या तुलनेत काँग्रेसची ताकद कमी असल्याने आगामी पालिका निवडणुका डोळ्यासमोर ठेवून काँग्रेसची ताकद वाढवण्याचा प्रयत्न करण्यात आला आहे.

काँग्रेसचे माजी ब्लॉक अध्यक्ष प्रकाश घोलप यांच्या निधनानंतर रिक्त झालेल्या ब्लॉक अध्यक्षपदी काँग्रेसचे निष्ठावंत कार्यकर्ते संजय जाधव यांची निवड जाहीर केली आहे. जाधव यांच्या माध्यमातून बदलापूर शहरात सुशिक्षित चेहरा देण्याचा प्रयत्न काँग्रेसच्या वतीने करण्यात आला आहे. जाधव यांच्या निवडीसोबतच ब्लॉगच्या कार्याध्यक्षपदी लक्ष्मण कुडव आणि रंजन एडवांकर यांची नियुक्ती करण्यात आली आहे.

आगामी निवडणुकीत नगरपालिकेच्या सत्तास्थापनेत काँग्रेस किंगमेकर ठरेल, असे मत संजय जाधव यांनी स्पष्ट केले आहे. महाविकास आघाडीतील मित्रपक्षांनी सन्मानपूर्वक वागणूक दिली तर आगामी निवडणुकीत महाविकास आघाडीसोबत निवडणूक लढवू अन्यथा आगामी पालिकेची निवडणूक स्वबळावर लढणार असल्याचेही जाधव यांनी सांगितले.

--------------------