अल्पवयीन मुलीवर लैंगिक अत्याचार : बांधकाम व्यावसायिक फरार

कल्याण : एका अल्पवयीन मुलीवर तिच्या इच्छेविरुद्ध वेश्या व्यवसाय करण्यास भाग पाडणाऱ्या व तिच्यावर लैंगिक अत्याचार करणाऱ्यांच्या विरोधात टिटवाळा पोलीस ठाण्यात गुन्हा दाखल झाला आहे. यातील एक आरोपी मांडा-टिटवाळ्यातील बांधकाम व्यावसायिक असल्याची माहिती उजेडात आली असून तो फरार असल्याची माहिती पोलिसांनी दिली.

पीडित अल्पवयीन मुलगी सध्या मुंबईत राहते. ती आपल्या आईबरोबर टिटवाळा येथे राहत असताना तिच्या आईने व मावशीने वेश्या व्यवसाय करण्यासाठी शरीर विक्रीच्या व्यवसायात जबरदस्तीने तिला राजी केले. याबाबत उल्हासनगर येथे राहत असलेला तृतीयपंथी ग्राहकाबरोबर संधान साधून अल्पवयीन मुलीला लॉजिंगमध्ये घेऊन जात असे. पीडितेची आई मध्यंतरी क्षयरोगाने तर मावशी कोरोनामुळे मृत पावली असून या गुन्ह्यात दोघींचाही सहभाग असल्याची माहिती पोलिसांनी दिली आहे. पोक्सो अंतर्गत या गुन्ह्यात सात आरोपी असून यातील दोन आरोपी मयत झाले आहेत. दोघांना अटक केली आहे. अन्य आरोपी फरार आहेत. आई आणि मावशी मयत झाल्याने अल्पवयीन मुलगी स्वयंसेवी संस्थेच्या संपर्कात आली. याबाबत तिने घडलेली हकीकत व लैंगिक अत्याचाराची माहिती त्यांना दिली. मुंबईतील विक्राेळी पार्कसाइट पोलीस ठाण्यात याबाबत समाजसेविकेने तक्रार केली असता ठाणे ग्रामीण पोलीस अधीक्षक यांच्याकडे वर्ग करण्यात आली. टिटवाळा पोलीस ठाण्यात पोक्सो अंतर्गत गुन्हा दाखल करण्यात आला.