लसीकरण केंद्रावर शिवसेना आणि भाजप पदाधिकारी भिडले

लोकमत न्यूज नेटवर्क

अंबरनाथ : बदलापूरमध्ये कोरोना लसीकरण केंद्रावर शिवसेना आणि भाजपच्या कार्यकर्त्यांमध्ये तुंबळ हाणामारी झाल्याची घटना घडली आहे. बुधवारी दुपारी बदलापूर पालिकेच्या दुबे रुग्णालयात हा प्रकार घडला. हाणामारीची ही संपूर्ण घटना सीसीटीव्हीत कैद झाली आहे. याप्रकरणी परस्परविरोधी गुन्हा दाखल करण्यात आला आहे.

कोरोना लसीकरण केंद्रांवर राजकीय कार्यकर्ते वशिलेबाजी करत असल्याच्या तक्रारी बदलापुरात अनेकदा समोर आल्या होत्या. राजकीय पुढारी आणि नगरसेवक हे आपल्या प्रभागातील नागरिकांना लसीकरण केंद्रावर वशिल्याने आतमध्ये प्रवेश देत होते. त्याच वादातून आज शिवसेनेचे पदाधिकारी आणि भाजपचे पदाधिकारी एकमेकांवर धावून गेले. एकीकडे लसीकरण सुरू असताना दुसरीकडे शिवसेना आणि भाजपच्या पदाधिकाऱ्यांमध्ये हाणामारी सुरू झाली. ही हाणामारी सोडवण्यासाठी काही नागरिक व सुरक्षारक्षकदेखील पुढे सरसावले, मात्र त्यांना आवरणे सुरक्षारक्षकांनादेखील अवघड गेले. अक्षरशः खाली पाडून लाथाबुक्क्यांनी एकमेकांना मारले. याचवेळी एका गटाच्या कार्यकर्त्याने दुसऱ्या गटाच्या कार्यकर्त्याच्या डोक्यात बेंच टाकला. या प्रकारामुळे लसीकरण केंद्रावर काही काळ गदारोळ निर्माण झाला होता. हा सगळा प्रकार लसीकरण केंद्रावरील सीसीटीव्ही कॅमेऱ्यात कैद झाला. दरम्यान, या प्रकाराबाबत बदलापूर पूर्व पोलीस ठाण्यात परस्परविरोधी गुन्हे दाखल करण्याची प्रक्रिया सुरू करण्यात आल्याची माहिती पोलिसांनी दिली आहे.

----------------