बदलापूरच्या कडक लॉकडाऊनला शिवसेनेचा विरोध

लोकमत न्यूज नेटवर्क

बदलापूर : बदलापूर शहरात शनिवारपासून आठ दिवसांचा कडकडीत लॉकडाऊन लागू करण्यात आला आहे. मात्र, या लॉकडाऊनला शिवसेनेने विरोध केला आहे. बदलापूर शहरातील रुग्णसंख्या कमी होत असताना आता कडक लॉकडाऊनची गरज काय, असा सवाल शिवसेनेने विचारला आहे. यासंदर्भात जाब विचारण्यासाठी शिवसेना शहरप्रमुख वामन म्हात्रे यांनी पालिका कार्यालयात ठाण मांडले होते.

बदलापूर शहरातील वाढती कोरोना रुग्णसंख्या लक्षात घेऊन बदलापूर पालिकेने मुरबाड पॅटर्नप्रमाणे सात दिवसांचा कडकडीत लॉकडाऊन लागू केला. त्यामध्ये मेडिकल, बँक आणि दवाखाने वगळता इतर सर्व दुकाने आस्थापना बंद करण्याचे आदेश पालिकेने दिले आहेत. मात्र, शासनाने ब्रेक द चेन मोहिमेंतर्गत सकाळी ७ ते ११ वाजेपर्यंत दुकानांना परवानगी दिलेली असताना आणि या मोहिमेमुळे शहरातील रुग्णसंख्या कमी होत असताना आता पुन्हा कडकडीत लॉकडाऊन करण्याची गरज काय, असा सवाल शिवसेनेने विचारला आहे. लॉकडाऊनला शिवसेनेने विरोध केला आहे. हाच विरोध दर्शवण्यासाठी शिवसेनेचे म्हात्रे हे शनिवारी सकाळपासून बदलापूर पालिकेच्या सभागृहामध्ये ठाण मांडून बसले. मुख्याधिकारी दीपक पुजारी यांनी आमच्या समोर येऊन आम्हाला स्पष्टीकरण द्यावे, अशी मागणी त्यांनी लावून धरली. मात्र, ही घोषणा गुरुवारी केल्यापासून पुजारी बदलापूर पालिकेत फिरकलेले नाहीत. त्यामुळे जोपर्यंत पुजारी येऊन आम्हाला स्पष्टीकरण देत नाहीत, तोपर्यंत आम्ही इथून उठणार नाही, अशी भूमिका म्हात्रे यांनी घेतली आहे.

..........

आ. किसन कथोरे यांनी साधला शिवसेनेवर निशाणा

बदलापूर शहरात कडकडीत लॉकडाऊन लावण्यात आला असून, शिवसेनेने याला विरोध केला आहे. यावरून आता मुरबाड विधानसभेचे भाजपचे आमदार किसन कथोरे यांनी शिवसेनेवर निशाणा साधला आहे. फक्त ठेकेदारी बंद झाली म्हणून लॉकडाऊनला विरोध केला जात असल्याचा आरोप कथोरे यांनी केला.

................

वाचली