भाईंदरच्या मिडलाइफ ऑर्केस्ट्रा बारमधील छुप्या खोलीत सहा बारबाला सापडल्या
By लोकमत न्यूज नेटवर्क | Published: March 1, 2021 04:47 AM2021-03-01T04:47:49+5:302021-03-01T04:47:49+5:30
मीरा रोड : भाईंदर पूर्वेच्या रेल्वेस्थानकसमोरील मिड लाइफ या ऑर्केस्ट्रा बारवर पोलीस उपायुक्त परिमंडळ-१च्या पथकाने धाड टाकून छुपी खोली ...
मीरा रोड : भाईंदर पूर्वेच्या रेल्वेस्थानकसमोरील मिड लाइफ या ऑर्केस्ट्रा बारवर पोलीस उपायुक्त परिमंडळ-१च्या पथकाने धाड टाकून छुपी खोली तोडून लपविलेल्या सहा बारबाला बाहेर काढल्या.
मीरा भाईंदर-वसई विरार पोलीस आयुक्तालयातील परिमंडळ-१चे उपायुक्त अमित काळे यांना मिड लाइफ ऑर्केस्ट्रा बारमध्ये गाण्याच्या तालावर बारबालांकडून अश्लील नृत्य करवून घेत असल्याची माहिती व्हिडिओ क्लिपद्वारे मिळाली. काळे यांच्या मार्गदर्शनाखाली सहायक पोलीस निरीक्षक दत्तूसाहेब लोंढे, विनायक मगर, अजय मांडोळे, जितेंद्र उथळे, विनोद चव्हाण, विजेता नाईक यांच्या पथकाने रात्री धाड टाकली. पथकाने मेकअप रूमचा काचेचा आरसा असलेल्या खोलीच्या संरचनेत बदल करून तयार केलेल्या ७ फूट लांब आणि ४.५ रुंद अशा छुप्या खोलीत दाटीवाटीने लपवलेल्या सहा बारबालांना अग्निशमन दलाच्या साहाय्याने बाहेर काढले.
बारबालाच्या जीवितास धोका निर्माण केल्याप्रकरणी, तसेच अन्य कलमांखाली नवघर पोलीस ठाण्यात बारचा चालक-मालक, ११ ग्राहक, १० बार कर्मचारी यांच्यावर गुन्हा दाखल करण्यात आला आहे.
.........................