राष्ट्रवादी काँग्रेसच्या ठाणे जिल्हा ग्रामीण अध्यक्षपदी सुरेश म्हात्रे 

Suresh Mhatre : गेल्या वर्षी सुरेश म्हात्रे यांनी राष्ट्रवादीत प्रवेश केला होता. म्हात्रे यांच्या कामाची दखल घेऊन पक्षश्रेष्ठींनी त्यांची ठाणे जिल्हा ग्रामीण अध्यक्षपदी नियुक्ती केली आहे.

भिवंडी - राष्ट्रवादी काँग्रेस पार्टीच्या ठाणे जिल्हा ग्रामीण अध्यक्ष पदी सुरेश म्हात्रे उर्फ बाळ्या मामा यांची बुधवारी नियुक्ती करण्यात आली आहे. मुंबई येथे राष्ट्रवादीचे अध्यक्ष शरद पवार यांच्या हस्ते म्हात्रे यांना नियुक्ती पत्र देण्यात आले. यावेळी राष्ट्रवादीचे प्रदेशाध्यक्ष जयंत पाटील, माजी मंत्री जितेंद्र आव्हाड, छगन भुजबळ, मावळते जिल्हाध्यक्ष दशरथ तिवरे, आनंद परांजपे आदी उपस्थित होते. बाळ्या मामा यांची ग्रामीण जिल्हाध्यक्षपदी नियुक्ती झाल्याने म्हात्रे यांच्या कार्यकर्त्यांमध्ये उत्साहाचे वातावरण पसरले आहे. 

गेल्या वर्षी सुरेश म्हात्रे यांनी राष्ट्रवादीत प्रवेश केला होता. म्हात्रे यांच्या कामाची दखल घेऊन पक्षश्रेष्ठींनी त्यांची ठाणे जिल्हा ग्रामीण अध्यक्षपदी नियुक्ती केली आहे. दरम्यान राष्ट्रवादीच्या नेत्यांनी आपल्यावर टाकलेल्या विश्वासास आपण कधीही तडा जाऊ देणार नाही व येणाऱ्या काळात राष्ट्रवादी काँग्रेस पक्ष ठाणे जिल्ह्यात वाढविण्यासाठी जास्तीत जास्त प्रयत्न करणार अशी प्रतिक्रिया सुरेश म्हात्रे यांनी लोकमतला दिली आहे.