पाणी भरताना झालेल्या वादातून तरुणावर दगडाने हल्ला; फरार आरोपीचा शोध सुरु

ठाण्याच्या बाळकूममधील घटना: कापूरबावडी पोलीस ठाण्यात गुन्हा

ठाणे: पाणी भरण्याच्या वादातून साहिल उर्फ आबीद खान (१७, रा. दादलानी रोड, बाळकूम, ठाणे) या तरुणावर रोहित गुंडीरे या तरुणाने दगडाने हल्ला केल्याचा प्रकार निदर्शनास आला आहे. याप्रकरणी खान याच्याविरोधात गुन्हा दाखल झाल्याची माहिती कापूरबावडी पोलिसांनी रविवारी दिली.

खान हा बाळकुम पाडा क्रमांक एक येथील कृष्णा पाटील यांच्या घरात भाडेकरु म्हणून वास्तव्याला आहे. शनिवारी सकाळी ९.३० वाजण्याच्या सुमारास तो एसराज विला दादलानी पाईपलाईन येथे त्याच्या घरासमोर नळाचे पाणी आल्यामुळे पाणी भरण्यासाठी उभा होता. तो नंबरप्रमाणे पाईपने पाणी भरत असताना रोहित याने त्याच्या हातातील पाण्याचा पाईप खेचला. परंतु, साहिल याने पाण्याचा पाईप सोडलाच नाही. याचाच राग आल्याने रोहित याने जमिनीवरील दगड घेऊन साहिलच्या कपाळावर आणि उजव्या पायाच्या गुडघ्यावर जोरदार प्रहार केला. यात जखमी झालेल्या साहिल याला एका खासगी रुग्णालयात उपचारासाठी दाखल केले आहे. या घटनेनंतर रोहित हा पसार झाला असून त्याच्याविरुद्ध गुन्हा दाखल केला आहे. त्याचा शोध घेण्यात येत असल्याचे पोलिसांनी सांगितले.