ठाणे मनपा परिवहन समितीचा ४५३.७२ कोटींचा अर्थसंकल्प, साडेचार कोटीने बजेट केले कमी

TMC News : ठाणे परिवहन सेवेने सादर केलेल्या ४५८.१३ कोटींच्या अर्थसंकल्पानंतर त्यावर परिवहन समितीने चर्चा केली होती. त्यानंतर शुक्रवारी समितीने ४५३.७२ कोटींचा अर्थसंकल्प स्थायी समितीला सादर केला.

ठाणे : ठाणे परिवहन सेवेने सादर केलेल्या ४५८.१३ कोटींच्या अर्थसंकल्पानंतर त्यावर परिवहन समितीने चर्चा केली होती. त्यानंतर शुक्रवारी समितीने ४५३.७२ कोटींचा अर्थसंकल्प स्थायी समितीला सादर केला. परिवहन प्रशासनाने सादर केलेल्या अर्थसंकल्पात चार कोटी ४१ लाखांनी कमी करून तो सादर केला; परंतु यामध्ये परिवहनने महापालिकेकडून मिळणाऱ्या अनुदानात वाढ केली आहे. दुसरीकडे परिवहनचे तिकीट दर बेस्टच्या धर्तीवर समान करण्याची हमीदेखील दिली आहे. त्यासाठी पत्रव्यवहारही करण्यात येणार असल्याचे परिवहन समिती सभापती विलास जोशी यांनी स्पष्ट केले.

ठाणे परिवहन सेवेने सादर केलेल्या अर्थसंकल्पानंतर त्यावर साधकबाधक चर्चा केल्यानंतर सभापती जोशी यांनी शुक्रवारी स्थायी समितीला तो सादर केला. यामध्ये परिवहन सेवेच्या इतर प्राधिकरणाचे किंबहुना बेस्टचे भाडे हे २५ रुपये असताना तेच भाडे ठाणे परिवहन सेवेचे ८५ रुपये आहे. इतर भाडेही इतर प्राधिकरणापेक्षा अधिक आहे. त्यामुळे एमएमआरडीए प्राधिकरणात प्रवासी सेवा देणाऱ्या विविध महापालिका परिवहन उपक्रमांचे भाडे समान करण्यासाठी प्रयत्न केले जाणार असल्याचे सांगण्यात आले आहे, तर यापूर्वी सादर झालेल्या अर्थसंकल्पात ५० मिडी बस घेण्यासाठी २३ कोटींची तरतूद केली होती. ही रक्कम पालिकेकडून अनुदानास्वरूपात मिळावी, अशी अपेक्षा व्यक्त केली आहे, तसेच परिवहन सेवेत इलेक्ट्रिक बस दाखल करण्यासाठी प्रयत्न केले जाणार असून, बेस्टमध्ये मुंबई आणि पुणे शहरामध्ये या बसकरिता ६० टक्के सबसिडी दिली जाते. त्यानुसार ठाणे परिवहन सेवेनेही तशीच सबसिडी मिळण्याची अपेक्षा व्यक्त केली आहे. 

परिवहन सेवेची कार्यक्षमता वाढावी व आर्थिक स्थिती बळकट व्हावी यासाठी अंदाजपत्रकात सुचविल्याप्रमाणे महापालिकेकडून २०२०-२१ च्या सुधारित अंदाजपत्रकात वाढीव १४ कोटी ८४ लाख, तसेच २०२१-२२ या मूळ अंदाजपत्रकात महसुली कामाकरिता २०९.७७ कोटी व संचलन तुटीपोटी ९२ कोटी ६४ लाख, अशी ३०२ कोटी ४१ लाखांच्या अनुदानाची मागणी केली आहे. या अर्थसंकल्पातील तरतुदींबाबत काय निर्णय हाेताे याकडे लक्ष लागले आहे.  

ठाणे महापालिकेने पुसली टीएमटीच्या तोंडाला पाने , मागितले ३०२.४१ कोटी, दिले १२२.९० कोटी
ठाणे : कोरोनामुळे ठाणे परिवहन सेवेच्या उत्पन्नावरदेखील परिणाम झाला आहे. परिवहनचा गाडा रूळावर येण्यासाठी प्रशासनाने सादर केलेल्या अंदाजपत्रकात यंदा २८४.६३ लाखांच्या अनुदानाची मागणी ठाणे महापालिकेकडे केली होती तर परिवहन समितीने यावर साधक-बाधक चर्चा करून या अनुदानाच्या रकमेत वाढ करून महापालिकेकडे ३०२.४१ कोटींची मागणी केली होती; परंतु महापालिकेने अर्थसंकल्पात परिवहनसाठी अवघे १२२.९० कोटी प्रस्तावित करून ‘परिवहन’च्या तोंडाला पाने पुसली आहेत.

मागील महिन्यात ठाणे परिवहन प्रशासनाने परिवहन समितीसमोर अर्थसंकल्प सादर केला होता. यामध्ये परिवहनला कोरोनामुळे झालेल्या नुकसानीनंतर सावरण्यासाठी पालिका प्रशासनाकडून २८४.६३ कोटींच्या अनुदानाची मागणी केली होती. त्यामध्ये परिवहन कर्मचाऱ्यांच्या थकीत देण्यांसह इतर देण्यांचादेखील समावेश होता. त्यानंतर आता शुक्रवारी परिवहन समितीने स्थायी समितीला सुधारित अर्थसंकल्प सादर केला आहे. 

यात परिवहन समितीने ३०२.४१ कोटींच्या अनुदानाची मागणी केली. मागील वर्षी परिवहनने २९१ कोटींची मागणी केली होती. परंतु, प्रत्यक्षात परिवहनला १३० कोटी मिळाले होते. त्यामुळे यंदा परिवहनने मागील वर्षीच्या तुलनेत यंदा ७ कोटींची कमी मागणी केली होती. त्यातही परिवहन समितीने वाढ केली होती. परंतु, पालिकेने सादर केलेल्या २०२१-२२ च्या मूळ अंदाजपत्रकात परिवहन प्रशासनासाठी १२२.९० कोटींचे अनुदान प्रस्तावित केले आहे.