कोरोनाचे नियम मोडणाऱ्या अडीच हजार चालकांविरुद्ध ठाणे वाहतूक पोलिसांची कारवाई

गेल्या १५ दिवसांपासून राज्यभरासह ठाणे जिल्हयातही कोरोना रुग्णांची संख्या मोठया प्रमाणात वाढत आहे. याच पार्श्वभूमीवर कोरोना संबंधित नियमांचे उल्लंघन करणाºया तब्बल अडीच हजार वाहनांवर ठाणे शहर वाहतूक नियंत्रण शाखेने गेल्या चार दिवसात कारवाईचा बडगा उगारला आहे.

ठळक मुद्देकोरोनाचा प्रादूर्भाव रोखण्यासाठी मोहीम१२ लाखांचा दंड वसूल

लोकमत न्यूज नेटवर्क
ठाणे: गेल्या १५ दिवसांपासून राज्यभरासह ठाणे जिल्हयातही कोरोना रुग्णांची संख्या मोठया प्रमाणात वाढत आहे. याच पार्श्वभूमीवर कोरोना संबंधित नियमांचे उल्लंघन करणाºया तब्बल अडीच हजार वाहनांवर ठाणे शहर वाहतूक नियंत्रण शाखेने गेल्या चार दिवसात कारवाईचा बडगा उगारला आहे. त्यांच्याकडून सुमारे १२ लाख रुपयांचा दंड आकारल्याची माहिती वाहतूक शाखेने दिली.
गेल्या काही दिवसांपासून ठाणे पोलीस आयुक्तालयाच्या कार्यक्षेत्रात कोरोना रुग्णांची संख्या वाढली आहे. त्यामुळे सोशल डिस्टन्सिंगच्या नियमांचे काटेकोरपणे पालन करण्याचे आवाहन पोलीस आयुक्त विवेक फणसळकर यांनी केले आहे. वारंवार आवाहन करुनही वाहन चालकांकडून कोरोना नियमांचे उल्लंघन मोठया प्रमाणात वाढले आहे. रिक्षातूनही दोन प्रवाशांना प्रवासाची मुभा आहे. तरीही शेअर रिक्षाच्या नावाखाली चार ते पाच प्रवाशांची सर्रास वाहतूक केली जाते. अनेक खासगी प्रवासी वाहतूक करणाºया वाहन चालकांकडूनही नियमांचे उल्लंघन होत आहे. याच पार्श्वभूमीवर पोलीस उपायुक्त बाळासाहेब पाटील यांच्या आदेशानुसार १९ ते २२ फेब्रुवारी या चार दिवसांच्या कालावधीत रिक्षा, मोटारसायकल, मोटारकार आणि अवजड वाहने अशा दोन हजार ५२७ वाहनांवर वाहतूक विभागाच्या १८ पथकांनी कारवाई केली. या चालकांकडून सुमारे १२ लाखांचा दंड आकारण्यात आला आहे. या कारवाईमध्ये सर्वाधिक एक हजार ९६९ रिक्षांवर त्यापाठोपाठ १७८ मोटारसायकल, १६५ मोटारकार आणि २१५ अवजड वाहनांवर कारवाई करण्यात आली आहे.

* याशिवाय, कर्णकर्कश आवाज करीत वाहने हाकणाºया चालकांवरही कारवाईचा बडगा उगारण्यात आला. गेल्या चार दिवसात अशा ७९ वाहनांवर कारवाई केल्याची माहिती सूत्रांनी दिली.
 

‘‘ वाहन चालकांनी वाहतुकीच्या नियमांसह कोविड १९ च्या नियमांचा भंंग केल्यास अशा प्रकारची कारवाई यापुढेही सुरु राहणार आहे. जादा प्रवाशांची वाहतूक करणाऱ्यांविरुद्ध साथ प्रतिबंध कायदा आणि मोटार वाहन कायद्यानुसार गुन्हा दाखल केला जाणार आहे. ’’
बाळासाहेब पाटील, पोलीस उपायुक्त, वाहतूक नियंत्रण शाखा, ठाणे शहर