मुख्यमंत्र्यांच्या उपस्थितीत ठाणे जिल्हा परिषद सदस्यांचा बाळासाहेबांच्या शिवसेनेत जाहीर प्रवेश 

मुख्यमंत्र्यांच्या उपस्थितीत ठाणे जिल्हा परिषद सदस्यांचा बाळासाहेबांच्या शिवसेनेत जाहीर प्रवेश केला आहे. 

भिवंडी: ठाणे जिल्हा परिषदेच्या पाच सदस्यांसह शहापूरच्या नगरसेविका व ठाकरे गटाचे शहापूरचे उप जिल्हा प्रमुख यांनी रविवारी मुख्यमंत्री एकनाथ शिंदे यांच्या उपस्थितीत बाळासाहेबांची शिवसेना पक्षात जाहीर प्रवेश केला. भिवंडी लोकसभा संपर्कप्रमुख सुरेश म्हात्रे उर्फ बाळा मामा यांच्या प्रयत्नांनी या पाचही सदस्यांनी रविवारी शिंदे गटात जाहीर प्रवेश केला आहे.यावेळी जिप सदस्यांनी मुख्यमंत्री शिंदे यांना पक्षाचे चिन्ह असलेली ढाल व तलवार प्रतीक भेट म्हणून दिले.

ठाणे जिल्हा परिषदेचे सदस्य लहू थापड, मधुकर चंदे, मोहन जाधव, तुळशी नामदेव गिरा, कांचन अविनाश साबळे या पाच सदस्यांसह शहपूरच्या माजी नगराध्यक्षा तथा नगरसेविका रंजना संतोष शिंदे व ठाकरे गटाचे शहापूर उपजिल्हा प्रमुख संतोष शिंदे यांनी मुख्यमंत्री एकनाथ शिंदे यांच्या उपस्थितीत ठाणे टेंभीनाका येथील अनंदाश्रमात शिंदे गटात जाहीर प्रवेश केला.यावेळी जिल्हा प्रमुख नरेश म्हस्के, भिवंडी लोकसभा संपर्क प्रमुख सुरेश म्हात्रे (बाळ्या मामा), प्रकाश पाटील, माजी आमदार पांडुरंग बरोरा, कलाताई शिंदे, शहर प्रमुख सुभाष माने, सुभाष पवार आदी नेते व कार्यकर्ते मोठ्या संख्येने उपस्थित होते.

मुख्यमंत्री एकनाथ शिंदे यांच्या विकास कार्याने प्रभावित होऊन आज या जिल्हापरिषद सदस्यांनी बाळासाहेबांची शिवसेनेत जाहीर प्रवेश केला असून भविष्यात मुख्यमंत्री एकनाथ शिंदे यांची ताकद वाढविण्यासाठी भिवंडी लोकसभा मतदार संघातील अनेक जिप व पंचायत समिती सदस्य व ग्रामपंचायत सरपंच शिंदे गटात प्रवेश करणार असल्याने जिल्ह्यात शिंदे गटाची ताकद आणखी वाढणार आहे अशी प्रतिक्रिया भिवंडी लोकसभा संपर्क प्रमुख सुरेश म्हात्रे उर्फ बाळ्या मामा यांनी याप्रसंगी दिली आहे.