घरात घुसून वृद्धेस लुटणारा रखवालदार गजाआड

नवघर पोलिसांनी रखवालदारास अटक करून दागिने हस्तगत केले आहेत . 

मीरारोड - इमारतीच्या रखवालदारानेच सदनिकेत शिरून ८२ वर्षीय वृद्ध महिलेच्या अंगावरील सोन्याचे दागिने लुटून पळाला होता . नवघर पोलिसांनी रखवालदारास अटक करून दागिने हस्तगत केले आहेत . 

भाईंदर पूर्वेच्या आर एन पी पार्क येथील श्वेता पार्क मध्ये राहणाऱ्या ८२ वर्षीय वृद्ध महिला  सावित्री ध्यानसिंग ठाकुर ह्या १९ सप्टेंबर रोजी घरी एकट्या होत्या . त्यावेळी अनोळखी लुटारूने घरात घुसून वृद्ध महिलेच्याअंगावरील ३ लाख २१ हजारांचे सोन्याचे दागिने बळजबरीने लुटून पसार झाला होता . नातू विकास जग्गी यांच्या फिर्यादी नंतर पोलिसांनी गुन्हा दाखल केला . गुन्ह्याचे गांभीर्य पाहता वरिष्ठ निरीक्षक विजय पवार यांच्या मार्गदर्शनाखाली गुन्हे प्रकटीकरणच्या पथकाने तपास सुरु केला . 

घटना घडल्या पासून इमारतीचा रखवालदार  राजेंद्र बहादुर कुँवर ( ४२ ) रा . पियुष अपार्टमेंट , आर एन पी पार्क हा पसार असल्याचे आढळले . पोलिसांनी विविध माध्यमातून शोध घेत राजेंद्र याला सालासर हनुमान मंदिर जवळच्या टर्फ येथून अटक केली .