बदलापुरात चोऱ्यांचे प्रमाण वाढले

बदलापूर : शहरात दिवसेंदिवस चोऱ्यांचे प्रमाण वाढल्याने व्यापाऱ्यांमध्ये भीतीचे वातावरण पसरले आहे. कोरोना संकटात त्रस्त झालेले व्यापारी चोऱ्यांमुळे अडचणीत सापडले आहेत.

गेल्या काही दिवसांपासून बदलापुरात चोरांचा सुळसुळाट झाला आहे. काही दिवसांपूर्वी पूर्व भागातील एका नामंकित शोरूममध्ये चोरी झाल्यानंतर आता आदर्श शाळेसमोरील ड्रीम कॅफेमध्ये चोरीची घटना घडली आहे. या कॅफेमध्ये रात्रीच्या सुमारास शटर तोडून चोरीचा प्रयत्न करण्यात आला असून, ही संपूर्ण घटना कॅमेऱ्यात कैद झाली आहे. चोरट्यांनी शटर तोडून चोरी केल्याचे समोर आले. या प्रकरणात चोरट्यांना रिकाम्या हाती परतावे लागले असले तरी दुकानदारांना शटरच्या झालेल्या नुकसानाचा भुर्दंड सहन करावा लागला आहे. पोलीस सीसीटीव्हीच्या आधारे चोरट्यांचा शोध घेत आहेत. दरम्यान, वाढत्या चोरीच्या घटना पाहता पोलिसांसमोर मोठे आव्हान उभे ठाकले आहे.