खासगी रुग्णालयाने केली तीन लाख ५८ हजारांची वीजचोरी

लोकमत न्यूज नेटवर्क

डोंबिवली : थकबाकीपोटी वीज पुरवठा खंडित केलेल्या कल्याण पूर्वेतील एका खासगी रुग्णालयाने तीन लाख ५८ हजार रुपयांची वीजचोरी केल्याची घटना उघडकीस आली आहे.

महावितरणच्या कल्याण पूर्व उपविभाग १ आणि भरारी पथकाने केलेल्या संयुक्त कारवाईत ही वीजचोरी उघड झाली आहे. चोरीच्या विजेचे देयक व दंडाची रक्कम भरण्याबाबत या रुग्णालयाला नोटीस बजावण्यात आली आहे. विहीत मुदतीत या रकमेचा भरणा न झाल्यास वीजचोरीचा गुन्हा दाखल होण्यासाठी आवश्यक फिर्याद देण्यात येणार असल्याचे महावितरणने बुधवारी प्रसिद्धीपत्रकाद्वारे जाहीर केले.

रुग्णालयाचे नऊ लाख रुपयांचे वीजबिल थकल्याने वीज पुरवठा खंडित करण्यात आला होता. थकीत वीज बिलाचा भरणा करण्याबाबत वारंवार पाठपुरावा करूनही रुग्णालयाने बिलाचा भरणा केला नाही. उलट पूर्वीच्या जुन्या नावाने रुग्णालय सुरू असल्याचे आढळून आले. महावितरणच्या कर्मचाऱ्यांनी तपासणी केली असता, रुग्णालयाची वीज जनरेटरवर सुरू असल्याचे दर्शविण्यात आले. सलग १५ दिवस पाळत ठेवल्यानंतर रुग्णालयाची बनवाबनवी उघडकीस आली. महावितरणरचे कर्मचारी रुग्णालयात तपासणीला आले की जनरेटरचा वापर व इतर वेळी विजेचा चोरटा वापर होत असल्याचे संयुक्त कारवाईत उघड झाले.

मुख्य अभियंता दिनेश अग्रवाल व अधीक्षक अभियंता सुनील काकडे यांच्या मार्गदर्शनाखाली कल्याण पूर्व उपविभाग १ चे अतिरिक्त कार्यकारी अभियंता जितेंद्र प्रजापती, भरारी पथकाचे अतिरिक्त कार्यकारी अभियंता धनंजय सातपुते व अमोल उके, सहायक सुरक्षा व अंमलबजावणी अधिकारी अतुल ओहळ, सहायक अभियंता किरण इमाळी यांच्या पथकाने ही कामगिरी केली.

दंड भरण्याची नोटीस

एप्रिल ते जून २०२१ या कालावधीत या रुग्णालयाने तीन लाख ५८ हजार ३०० रुपये किमतीच्या ११ हजार पाच युनिट विजेचा चोरटा वापर केल्याचे निष्पन्न झाले. चोरीच्या विजेचे तीन लाख ५८ हजार व एक लाख ४५ हजार रुपये दंड भरण्याची नोटीस रुग्णालयास बजावण्यात आली आहे.

------------------