उल्हासनगरात इमारतीचा स्लॅब कोसळून तीन जण गंभीर जखमी

उल्हासनगर : कॅम्प नं.१, सी ब्लॉक परिसरातील पाच मजली देवऋषी इमारतीचा पहिल्या मजल्याचा स्लॅब कोसळून तळमजल्यावर राहणारे गिधवानी कुटुंबातील तिघे जण गंभीर जखमी झाले. सहायक आयुक्त गणेश शिंपी यांच्या नेतृत्वाखाली इमारत रिकामी करण्यात येत असून तब्बल २७ फ्लॅटधारकांची राहण्याची पर्यायी व्यवस्था करण्यात येत आहे.

उल्हासनगरात इमारतीचे स्लॅब कोसळण्याचे सत्र सुरू असून कॅम्प नं.१, सी ब्लॉक साईबाबा मंदिर जवळील देवऋषी इमारतीचा पहिल्या मजल्याचा स्लॅब कोसळून हॉलमध्ये बसलेले राजू गिधवानी (५७), कांता गिधवानी व ८ वर्षांची जन्नत विक्की गिधवानी असे तीन जण जखमी झाले. इमारतीचा स्लॅब कोसळल्याची माहिती सहायक आयुक्त शिंपी यांना मिळाल्यावर, त्यांनी पथकासह घटनास्थळी धाव घेऊन जखमींना रुग्णालयात दाखल केले. सुरक्षेचा उपाय म्हणून इमारत रिकामी करण्यात येत आहे. तळमजल्यावर दुरुस्तीचे काम सुरू असल्याचे काहीचे म्हणणे होते.

देवऋषी ही इमारत १९९४ साली बांधण्यात आली असून इमारतीला स्ट्रक्चरल ऑडिटची नोटीस यापूर्वी महापालिकेने पाठविली होती, अशी माहिती उपायुक्त अशोक नाईकवाडे यांनी दिली. १९९४ ते ९८ दरम्यान बांधण्यात आलेल्या इमारतीचे सर्वेक्षण पालिकेने करून ५०५ इमारतींना एका महिन्यात स्ट्रक्चरल ऑडिट करण्याच्या नोटिसा दिल्या होत्या. नागरिकांनी तातडीने इमारतीचे ऑडिट करावे, असे आवाहन नाईकवाडे यांनी केले. एका महिन्यापूर्वी मोहिनी पॅलेस व साईशक्ती इमारतीचा स्लॅब कोसळून १२ जणांचा बळी गेला.

...............

वाचली