पडलेल्या झाडाच्या फांदीमुळे जागीच थांबला ट्रक

ठाणे : गुजरात येथून ठाणेमार्गे तळोजा येथे निघालेल्या ट्रकवर ठाण्यात पिंपळाच्या झाडाची फांदी पडली. या पडलेल्या मोठ्या फांदीने जागीच ट्रक थांबल्याची घटना शुक्रवारी पहाटे पावणेपाच वाजण्याच्या सुमारास ठाणे मध्यवर्ती कारागृहाजवळील हनुमान मंदिर येथे घडली. यामध्ये कोणालाही दुखापत वा वाहतुकीवर कोणताही परिणाम झाला नसल्याची माहिती ठामपा आपत्ती व्यवस्थापन विभागाच्या अधिकाऱ्यांनी दिली.

ट्रकचालक बंकाराम हे गुजरात येथून नवी मुंबईतील तळोजा येथे निघाले होते. ठाण्यातील जेल येथून जात असताना पहाटे पावणेपाच वाजण्याच्या सुमारास पिंपळाच्या झाडाची फांदी अचानक ट्रकवर पडली आणि ट्रक जागच्या जागी थांबला. घटनेची माहिती मिळताच ठाणे आपत्ती व्यवस्थापन, वृक्ष प्राधिकरण या विभागांसह ठाणे नगर वाहतूक पोलिसांनी घटनास्थळी धाव घेऊन पडलेल्या झाडाची मोठी फांदी तातडीने रस्त्याच्या एका बाजूला केल्याची माहिती आपत्ती व्यवस्थापन विभागाने दिली.