पत्नीच्या छेडखानीचा जाब विचारणाऱ्या पतीला मारहाण केल्याच्या दोन घटना 

महिलांची छेडखानी करून वर जाब विचारणाऱ्या पतीनाच मारहाणीच्या दोन घटना घडल्याने चिंता व्यक्त होत आहे .

मीरारोड - पत्नीची छेडखानी करणाऱ्या भामट्याना जाब विचारणाऱ्या पतींना मारहाणीच्या घटना मीरा भाईंदर मध्ये घडल्या असून नवघर व नया नगर पोलीस ठाण्यात गुन्हे दाखल झाले आहेत . 

मीरारोडच्या नया नगर पोलीस ठाण्यात दाखल गुन्ह्या नुसार भाईंदर मध्ये राहणारे फिर्यादी पती हे पत्नीसह रविवारी सायंकाळी एका हॉटेल मध्ये जेवणास गेले होते . त्यावेळी आरिफ नावाच्या व्यक्तीने पत्नीला कॉल करून माझ्या सोबत जेवणास येते का असे विचारले . त्यावर पतीने त्यास माझ्या पत्नी सोबत असे का बोलला ? असा जाब विचारून समज दिली . त्याचा राग धरून आरिफ याने एका मित्र व मैत्रीणीसह नया नगर भागात महिलेच्या पतीस गाठले. त्याला शिवीगाळ करत ठोश्या बुक्क्यांनी, पट्टा व गाडीने चावीने मारहाण करत जखमी केले . नया नगर पोलिसांनी तिघांवर गुन्हा दाखल केला आहे . 

दुसरी घटना भाईंदर पूर्व भागात घडली आहे . एक महिला २३ सप्टेंबरच्या रात्री उशिरा घरी जात असताना एका व्यक्तीने तिच्या कंबरेला हाताने पकडले . तिने पतीला सदर प्रकार सांगितल्यावर तो जाब विचारण्यास गेला असता तिघा अनोळखी इसमांनी त्यास शिवीगाळ करून मारहाण केली . या बाबत रविवारी रात्री नवघर पोलिसांनी तिघांवर गुन्हा दाखल केला आहे . या प्रकरणी सहायक फौजदार लक्ष्मण पाटील तपास करत आहेत . 

महिलांची छेडखानी करून वर जाब विचारणाऱ्या पतीनाच मारहाणीच्या दोन घटना घडल्याने चिंता व्यक्त होत आहे . अशा रोडरोमियों वर कठोर कारवाईची मागणी होत आहे .