ठाण्यात कोसळली दोन झाडे; तीन वाहनांचे किरकोळ नुकसान

या दोन्ही घटनांची माहिती मिळताच त्या त्या घटनास्थळी आपत्ती व्यवस्थापन कक्षाचे कर्मचारी आणि अग्निशमन दलाचे जवान यांनी धाव घेतली.

ठाणे : शहरात वेगवेगळ्या दोन ठिकाणी झाडे कोसळल्याचा घटना मंगळवारी सकाळच्या सुमारास समोर आल्या आहेत. एका घटनेत तीन वाहनांवर झाड पडल्याने त्या वाहनांचे किरकोळ नुकसान झाले आहे. सुदैवाने या दोन्ही घटनेत कोणालाही दुखापत झाली नसून पडलेले झाडे कापून एका बाजूला करण्यात आली आहे. अशी माहिती आपत्ती व्यवस्थापन कक्षाने दिली.

ठाण्यातील कोर्टनाका, सेंट्रल मैदान,पोलीस लाईनच्या आवारामधील एक झाड तेथे पार्क केलेल्या दोन चारचाकी व एका दुचाकी वाहनांवर कोसळले ही घटना मंगळवारी सकाळी पावणे सात ते सात वाजण्याच्या घडली. तर दुसरी घटना मंगळवारी सकाळी साडेसहा वाजण्याच्या सुमारास बाळकुम, लोढा जॉगिंग ट्रॅक जवळ घडली. या ठिकाणी रोडवरती झाड पडले. या दोन्ही घटनांची माहिती मिळताच त्या त्या घटनास्थळी आपत्ती व्यवस्थापन कक्षाचे कर्मचारी आणि अग्निशमन दलाचे जवान यांनी धाव घेतली. तसेच पडलेले झाडे कापून एका बाजूला करण्यात आले आहे. तर कोर्टनाका येथील घटनेत, झाड पडल्याने तिन्ही वाहनांचे किरकोळ नुकसान झाले असे आपत्ती व्यवस्थापन कक्षाकडून सांगण्यात आले.