विनाहेल्मेट १८८९ दुचाकीस्वारांनी भरला नऊ लाख ३४ हजारांचा दंड

ठाणे : कोरोनामुळे अत्यावश्यक सेवेव्यतिरिक्त रेल्वे सेवा सध्या बंद आहे. त्यामुळे रस्त्यावरील वाहनांची संख्या वाढली आहे. अशा वेळी रस्त्यांवरील अपघातांमध्ये मृत्यूंचे प्रमाण वाढल्यामुळे ठाणे शहर वाहतूक शाखेने गेल्या तीन दिवसांत हेल्मेटचा वापर न करताच मोटारसायकल चालविणाऱ्या १ हजार ८८९ चालकांकडून नऊ लाख ३४ हजारांचा, तर सीटबेल्टचा वापर न करणाऱ्या मोटारकार चालकांकडून १ लाख ६८ हजारांचा दंड वसूल केल्याची माहिती सूत्रांनी दिली.

मार्च २०२१ पासून सुरू झालेल्या कोरोनाच्या दुसऱ्या लाटेमध्ये उपनगरी रेल्वेसेवा ही केवळ अत्यावश्यक सेवांसाठी सुरू ठेवली आहे. त्यामुळे खासगी कामासाठी किंवा नोकरीसाठी मुंबईतून ठाणे परिसरात ये-जा करणाऱ्या नागरिकांना रेल्वेत प्रवेश दिला जात नाही. त्यामुळे अनेक जण मिळेल त्या वाहनाने मुंबईतून ये- जा करीत आहेत. त्यामुळेच सध्या ठाणे ते मुंबईकडे जाणाऱ्या रस्त्यांवर गर्दी वाढल्यामुळे वाहतुकीची वर्दळ वाढली आहे. वाढत्या वाहनसंखेमुळे अपघातांचे प्रमाणही वाढले असून यामध्ये ७० टक्के अपघात हे मोटारसायकल (बाइक) स्वारांचे होत आहेत. त्यातही मृत्यूचे प्रमाण ८० टक्के आहे. हे अपघाती मृत्यू टाळण्यासाठी हेल्मेटचा वापर होणे अत्यंत महत्त्वाचे आहे. तसेच मोटारकार वाहनांच्या अपघातामध्येही सीटबेल्टचा वापर न केल्याने सुरक्षेसाठी असलेल्या वाहनांमधील एअरबॅग न उघडल्याने गंभीर किंवा प्राणांतिक अपघात झाले आहेत.

अपघातग्रस्तांचे प्राण वाचविण्यासाठी ठाणे शहर वाहतूक शाखेचे पोलीस उपायुक्त बाळासाहेब पाटील यांनी विनाहेल्मेट दुचाकी चालणाऱ्या तसेच मोटारकारमध्ये सीटबेल्ट न लावणाऱ्यांविरुद्ध कारवाईचे आदेश दिले आहेत. यानुसार १८, १९ आणि २१ जून या तीन दिवसांच्या कालावधीत विशेष तपासणी मोहीम राबविली. आयुक्तालयातील १८ वाहतूक उपविभागामार्फत १ हजार ८८९ दुचाकी चालकांवर कारवाई करून प्रत्येकी ५०० रुपये याप्रमाणे ९ लाख ३४ हजार ५०० रुपये दंड वसूल केला. तर सीटबेल्ट न लावताच वाहन चालविणाऱ्या ८४३ चालकांकडून १ लाख ६८ हजार ६०० रुपयांचा दंड वसूल केला. या मोहिमेमध्ये एकूण ११ लाख ३ हजारांचा दंड वसूल केला.