भाजप कार्यालयाची तोडफोड, शिवसैनिकांना अटक करा

कल्याण : केंद्रीय मंत्री नारायण राणे यांनी मुख्यमंत्री उद्धव ठाकरे यांच्या विरोधात केलेल्या वक्तव्याच्या निषेधार्थ मंगळवारी शिवसैनिकांनी भाजपचे शहर कार्यालय तोडल्याच्या निषेधार्थ संतप्त भाजप कार्यकर्त्यांनी बाजारपेठ पोलीस ठाणे ते शिवाजी चौकापर्यंत मोर्चा काढला. तसेच तेथे ठिय्या दिला. तोडफोड करणाऱ्या शिवसैनिकांना अटक करा, अन्यथा तीव्र आंदोलन करण्याचा इशारा भाजपने पोलिसांना दिला आहे.

शिवसेनेचे महानगर प्रमुख विजय साळवी, आ. विश्वनाथ भोईर व शिवसैनिकांनी भाजप कार्यालयाची तोडफोड केली. यावेळी भाजप कार्यकर्ते प्रसाद टुमकर यांनाही मारहाण करण्यात आली. त्यामुळे भाजपचे संतप्त कार्यकर्ते बाजारपेठ पोलीस ठाण्यात जमा झाले. भाजप शहराध्यक्ष प्रेमनाथ म्हात्रे, माजी नगरसेविका वैशाली पाटील, महिला आघाडीच्या प्रिया शर्मा, आदींनी टुमकर यांच्या मारहाणप्रकरणी भोईर, साळवी यांना अटक करण्याची मागणी केली. पोलिसांच्या उपस्थितीत शिवसैनिक मारहाण करतात, तेव्हा पोलीस काय झोपले होते का, असा सवालही त्यांनी केला.

यावेळी पोलिसांनी त्यांची मागणी ऐकून घेत टुमकर यांना वैद्यकीय तपासणीस नेण्याचा प्रयत्न केला. मात्र, टुमकर यांनी त्यास नकार दिला. त्यानंतर भाजप कार्यकर्त्यांनी ॲक्शनचा जबाब रिॲक्शनने देण्यासाठी बाजारपेठ पोलीस ठाण्यापासून पारनाका परिसरातून मोर्चा काढला. भाजप कार्यकर्त्यांचा टिळकनगर शिवसेना शाखेवर हल्ला करण्याचा प्रयत्न होता. मात्र, मोर्चा पारनाक्याहून शिवाजी चौकाच्या दिशेने गेला. तेव्हा शिवाजी चौकातील शिवसेना शाखा तोडण्याची कुजबुज भाजप कार्यकर्त्यांमध्ये असल्याने पोलिसांनी शिवाजी चौकात मोर्चा अडविला. त्यामुळे भाजप कार्यकर्त्यांनी शिवाजी चौकात ठिय्या धरला. यावेळी पोलिसांनी कार्यकर्त्यांना रोखण्याचा प्रयत्न केला.

-------------

शिवसैनिकांनी भाजप कार्यालयावर केलेला हल्ला हा भ्याड हल्ला आहे. आधी आवाज द्या, मग हल्ला करा, तेव्हा भाजप कार्यकर्त्यांची काय ताकद हे कळेल. आता भाजप कार्यकर्ते शांत दिसत असले तरी उद्या काय होईल याची जबाबदारी पोलिसांची असेल. तेव्हा भाजपने कायदा हाती घेतला असे बोलू नका. आधी हल्ला करणाऱ्या शिवसैनिकांना अटक करा.

- प्रेमनाथ म्हात्रे, भाजप, कल्याण शहराध्यक्ष

----------