पाणी शिरलेल्या घरांना नुकसान भरपाई द्यावी

कल्याण : अतिवृष्टीमुळे कल्याण-डोंबिवली परिसरातील नदी व खाडी किनारी राहणाऱ्या तसेच सखल भागात वास्तव्य करणाऱ्या नागरिकांच्या घरात पावसाचे पाणी शिरून झालेल्या नुकसानाचे तहसील कार्यालयाने पंचनामे करून त्यांना सरकारतर्फे नुकसान भरपाई द्यावी, अशी मागणी शिवसेनेचे माजी नगरसेवक दीपेश म्हात्रे यांनी केली.

डोंबिवली खाडी परिसर, मोठा गाव ठाकुर्ली, कोपर परिसरासह कल्याण खाडीलगत असलेला रेतीबंदर परिसर, वालधुनीनजीक असलेल्या योगीधाम, अनुपमनगर, कल्याण पूर्व भागातील कैलासनगर, अशोकनगर परिसरातील नागरिकांच्या घरात पावसाचे पाणी शिरले. त्यांच्या गृहोपयोगी वस्तू, विजेवर चालणारी उपकरणे आदीचे मोठे नुकसान झाले. आधीच कोरोनामुळे मेटाकुटीला आलेल्या नागरिकांचे संसार पाण्यात बुडाले. त्यांना सरकारकडून आर्थिक मदत मिळावी यासाठी तहसील कार्यालयाने त्या भागातील नुकसानग्रस्त घरांचे पंचनामे करावे. अहवाल जिल्हाधिकारी कार्यालयामार्फत सरकारला द्यावा, अशी मागणी म्हात्रे यांनी केली.

यासंदर्भात तहसील कार्यालयाकडे विचारणा केली असता, पावसामुळे घरांचे नुकसान झाले असले तरी यापुढेही पाऊस पडण्याचा अंदाज व्यक्त करण्यात आला आहे. मात्र येत्या सोमवारपासून पंचनामे सुरू करण्यात येणार आहेत.

........

कल्याण-डोंबिवली शहराला २०१९ साली अतिवृष्टीचा जोरदार फटका बसला होता. त्यावेळी तहसील कार्यालयातर्फे पंचनामे करण्यात आले होते. मात्र नुकसानग्रस्त घरांपैकी केवळ ३० टक्के लोकांना आर्थिक भरपाई मिळाली होती. उर्वरित ७० टक्के नागरिकांना भरपाई मिळालीच नाही. मागील नुकसान भरपाईची रक्कम आणि आता झालेल्या नुकसानीची रक्कम दोन्ही द्यावी, असे म्हात्रे म्हणाले.

----------------------------------

वाचली