कुजबुज शनिवारचे सदर

..............

वरळी आमची लाडोबा

मागील विधानसभा निवडणूक आदित्य ठाकरे हे वरळीतून लढले व जिंकले. पाठोपाठ राज्यात शिवसेनेच्या नेतृत्वाखाली महाविकास आघाडीचे सरकार आले. या सरकारमध्ये आदित्य ठाकरे हे केवळ मंत्री असले, तरी अलिखित उपमुख्यमंत्रीच आहेत. मुख्यमंत्री उद्धव ठाकरे यांच्याकडून एखादा निर्णय मंजूर करवून घ्यायचा असेल, तर आदित्य यांना ब्रिफिंग द्यावे लागते, अशी चर्चा आहे. मूळ मुद्दा हा की, वरळीकरांनी (सचिन अहिर यांच्यासह) आदित्य यांना निवडून दिल्याने आदित्य हे वरळीबाबत वरचेवर बैठका घेतात. नवी आधुनिक रंगीबेरंगी सिग्नल यंत्रणा वरळीत बसली. रस्त्यांच्या फरशांपासून सार्वजनिक स्वच्छतागृहांपर्यंत जे जे उत्तम, उदात्त, उन्नत ते ते वरळीकरांना लाभत आहे. मुंबई महापालिकेची निवडणूक जवळ येत असल्याने मुंबईकरांना जी स्वप्नं दाखवायची आहेत, ती वरळीकरांच्या दारात प्रथम उभी असतात. त्यामुळे मुंबईतील दादरकर, अंधेरीकर, बोरिवलीकर, घाटकोपरकर, वगैरे वरळीत फ्लॅट खरेदी करावा की काय, या विचारात आहेत. ज्यांना हे शक्य नाही, ते आदित्य हे मुंबई शहराचे पालकमंत्री आहेत की वरळीचे, असा कुत्सित स्वर लावत आहेत. पण, आदित्य यांनी वरळीचे लाड पुरवणे थांबवलेले नाही आणि थांबणार नाही.

.............

बार बार ये दिन आए

कोरोनाच्या लॉकडाऊनमुळे सर्वसामान्य ठाणेकर दुपारी चार वाजण्याच्या आत दूधदुभते घरात आणून रात्री आठनंतर खिडक्या-दारे बंद करून अन् दहा वाजता मराठी मालिका पाहून झोपी जात असताना त्याच ठाण्यात रात्री दहानंतर (म्हणजे कोरोना कर्फ्यू लागू झाल्यावर) छमछमचा जोश चढत होता. आंबटशौकीन (सी व्हिटॅमिनची कमतरता जाणवल्याने) अंधारात डान्स बारमध्ये जात व मास्कबिस्क भिरकावून देत बेधुंद होऊन पहाटे चार वाजता बाहेर पडत. याचे बिंग फुटले आणि दोन वरिष्ठ पोलीस इन्स्पेक्टर, उत्पादन शुल्क विभागाचे दोन अधिकारी व दोन कर्मचारी निलंबित झाले. काहींना बदलीचे काळे पाणी दाखवले गेले. या डान्स बारने अनधिकृत बांधकामे केली होती. त्यामुळे महापालिकेनेही बदल्यांचा बडगा उगारला. आतापर्यंत डान्स बार सुरू राहिला, तर किरकोळ कर्मचाऱ्यांच्या बदल्या व्हायच्या. प्रथमच ठाण्यात ही कारवाई झाल्याने मिसळच्या झणझणीत तर्रीवर ताव मारताना या झणझणीत कारवाईबाबत `बार बार ये दिन आए`, असे सामान्य ठाणेकर म्हणत आहेत.

..........

वाचली