भिवंडीत ट्रकच्या धडकेत दुचाकी वरील महिला ठार

शहरातील अवजड वाहनांचा प्रश्न ऐरणीवर

भिवंडी: पतीसह दुचाकीवरून जात असलेल्या जोडप्याच्या दुचाकीला अवजड ट्रकने धडक दिल्याने झालेल्या अपघातात पाठीमागे बसलेली महिला जागीच ठार झाल्याची दुर्दैवी घटना भिवंडीतील डॉ. एपीजे अब्दुल कलाम उड्डाणपुलावर बुधवारी दुपारी घडली आहे.या घटनेने शहरात हळहळ पसरली असून शहरात अवजड वाहनांना बंदी असतानाही अवजड ट्रक रस्त्यावर कसे धावतात असा प्रश्न नागरिक विचारत असून अवजड वाहनांचा प्रश्न ऐरणीवर आला आहे.

तेहसीन शहाबाज अंसारी वय अंदाजे २५ वर्ष असे महिलेचे नाव असून सदर महिला आपल्या पतीसह महापोली गावातील एका शाळेत शिक्षिकेचे काम करत होती. मागील वर्षभरापूर्वीच तिचा विवाह झाला होता.बुधवारी हि महिला पती शहाबाज अंसारी यांच्या सह दुचाकीवरून वंजारपट्टी नाका येथील डॉ.एपीजे अब्दुल कलाम उड्डाणपुलावर आली असता अवजड ट्रक ने त्यांच्या दुचाकीला धडक दिल्याने झालेल्या अपघातात महिलेचा जागीच मृत्यू झाला आहे.सुदैवाने या अपघातात पती शहाबाज हा वाचला असून त्यास जखमी अवस्थेत खासगी रुग्णालयात दाखल करण्यात आले आहे.

शहरात होत असलेल्या प्रचंड वाहतूक कोंडीच्या समस्येतून सुटका मिळण्यासाठी शहरात अवजड वाहनांना बंदी असतानाच भर दुपारी अवजड वाहने उड्डाणपूलांवरून सोडली जात असल्यानेच महिलेचा मृत्यू झाला आहे त्यामुळे या महिलेच्या मृत्यूस अवजड वाहने व वाहतूक पोलिसांचा दुर्लक्षित कारभार जबाबदार असल्यास ची प्रतिक्रिया शहरातील दक्ष नागरिकांकडून येत आहे.