डॉक्टरच्या वेशात नराधम! गुंगीचे इंजेक्शन देऊन महिलांवर बलात्कार करायचा, एका पेशंटने बिंग फोडले

दिल्लीच्या रोहिणी भागात एक महिला काही काळापासून आजारी होती. तिला गाजियाबादमधील खोडा येथील डॉक्टर साकिबबाबत माहिती मिळाली.

उत्तर प्रदेशच्या गाझिय़ाबादमध्ये एका डॉक्टरने सहकारी डॉक्टरच्या साथीने उपचारासाठी आलेल्या एका महिलेवर सामुहिक बलात्कार केला आहे. धक्कादायक बाब म्हणजे यापूर्वीही त्याने त्याच्याकडे येणाऱ्या तरुणी, महिलांवर असेच बलात्कार केल्याचे कबुलही केले आहे. पोलिसांनी आरोपी डॉक्टरला अटक केली असून त्याचा साथीदार अद्याप फरार आहे. 

दिल्लीच्या रोहिणी भागात एक महिला काही काळापासून आजारी होती. तिला गाजियाबादमधील खोडा येथील डॉक्टर साकिबबाबत माहिती मिळाली. म्हणून तिने त्याला फोन केला. साकिबने तिला पूर्णपणे बरे करण्याचे आश्वासन दिले. या आशेने ती महिला खोडाला गेली. 

पहिल्या व्हिजिटमध्ये डॉक्टरने तिला काही औषधे दिली, परंतू त्याने बरे वाटले नाही. म्हणून पुन्हा १९ जूनला तिला डॉक्टरने बोलवून घेतले. यावेळी तिला गुंगीचे इंजेक्शन दिले. यानंतर डॉ. साकिबने त्याचा मित्र डॉक्टर जकीसोबत तिच्यावर सामुहिक बलात्कार केला. जेव्हा त्या महिलेला शुद्धी आली तेव्हा तिच्या अंगावर कपडे नव्हते. डॉक्टरने तिला याबाबत कोणाला सांगिते तर तिचे व्हिडीओ व्हायरल करण्याची धमकी दिली. 

काही दिवस महिला घाबरल्याने कोणाला काहीच बोलली नाही. नंतर तिने आरोपी डॉक्टरविरोधात पोलिसांत धाव घेतली. यापूर्वीही असे अनेक तरुणी, महिलांवर बलात्कार केल्याचे त्या डॉक्टरनेच आपल्याला सांगितल्याचे या पीडित महिलेने पोलिसांना सांगितले.