चोराचा अजब कारनामा; चोरी करायला घरात शिरला अन् AC च्या थंडाव्यात झोपी गेला, सकाळी...

चोराचा अजब कारनामा; चोरी करायला घरात शिरला अन् AC च्या थंडाव्यात झोपी गेला, सकाळी...

एखाद्या घरात चोरी केल्यानंतर चोर कुठलाही पुरावा सोडत नाहीत. पण, कधी-कधी चोरी फसते अन् चोर पोलिसांच्या जाळ्यात अडकतो. उत्तर प्रदेशातील लखनऊमध्ये तर चोरीची विचित्र घटना घडली आहे. चोरी करण्यासाठी एका बंद घरात गेलेला चोर थकला अन् घरातील AC लावून चक्क झोपी गेल. सकाळी शेजाऱ्यांनी पोलिसांना चोरीची माहिती दिली. या विचित्र घटनेची सध्या परिसरात चर्चा सुरू आहे.

मिळालेल्या माहितीनुसार, चोराने रविवारी पहाटे कुलूप तोडून लखनऊच्या इंदिरानगर सेक्टर 20 येथील डॉ. सुनील पांडे यांच्या घरात प्रवेश केला. त्याने सर्व मौल्यवान वस्तू पोत्यात भरुन ठेवल्या. तेथून पळून जाण्याची त्याच्याकडे संधी होती, पण तो चक्क घरातील एसी लावून झोपी गेला. सकाळी शेजाऱ्यांना डॉक्टर पांडे यांच्या घराचा दरवाजा उघडा असल्याचे दिसले. त्यांनी आत डोकावून पाहिले असता, घर अस्ताव्यस्त अवस्थेत आढळले. यानंतर शेजाऱ्यांनी तत्काळ पोलिसांना माहिती दिली. 

पोलीस घटनास्थळी पोहोचले असता त्यांना चोर झोपलेला दिसला. चोरटा दारुच्या नशेत इतका गाढ झोपला होता की, त्याला पोलिस येईपर्यंत जाग आली नाही. कपिल त्या असे चोरट्याचे नाव असून त्याच्याकडून चोरीचा माल जप्त करण्यात आला आहे. पोलिसांनी कपिलला अटक केली असून त्याच्याविरुद्ध भादंवि कलम 379अ अन्वये चोरीचा गुन्हा दाखल करण्यात आला आहे.