'या' चित्रपटात दिसणार सीमा हैदर; दिग्दर्शकांनी घेतली ऑडिशन! 

या चित्रपटाचे दिग्दर्शन जयंत सिन्हा आणि भरत सिंह करत आहेत.

सीमा हैदर आणि सचिन मीना यांची प्रेमकहाणी सध्या चांगलीच गाजत आहे. आता सीमा हैदर मोठ्या पडद्यावर एन्ट्री करणार आहे. चित्रपटाचे नाव आणि तिची भूमिका जवळपास निश्चित झाली आहे. राजस्थानमधील उदयपूर येथील शिंपी कन्हैया लालच्या हत्येवर हा चित्रपट तयार होणार आहे. ' A Tailor Murder Story' असे या चित्रपटाचे नाव आहे. यामध्ये सीमा हैदर एका रॉ एजंटच्या भूमिकेत दिसणार आहे. 

या चित्रपटाचे दिग्दर्शन जयंत सिन्हा आणि भरत सिंह करत आहेत. त्यांनी सीमा हैदरची ऑडिशन घेतली आहे. हा चित्रपट Jani Firefox प्रोडक्शन हाऊसच्या बॅनरखाली बनवला जाणार आहे. चित्रपट निर्माते अमित जानी यांनी बुधवारी सीमा हैदर हिची भेट घेतली आणि श्रीफळ व शाल दिली. दरम्यान, सीमा आणि सचिनचे कुटुंब आर्थिक संकटाचा सामना करत असल्याची बातमी समोर येताच त्यांना अमित जानी यांनी चित्रपटात कामाची ऑफर दिली होती.

सीमा हैदर आणि सचिन मीना यांची प्रेमकहाणी भारतापासून पाकिस्तानपर्यंत चर्चेत आहे. त्यांची प्रेमकहाणी सोशल मीडियावर सुद्धा चांगलीच गाजत आहे. मात्र सीमा प्रेमासाठी आली की काही दुसऱ्या हेतूने आली याबद्दल अनेक तर्कवितर्क लावले जात आहे. सीमा पाकिस्तानी गुप्तहेर असल्याचा संशय काही लोकांकडून व्यक्त केला जात आहे. पण हे अजून सिद्ध झालेले नाही. याबाबत भारतीय सुरक्षा यंत्रणांकडून सीमा हैदरची चौकशीही करण्यात येत आहे. 

उत्तर प्रदेश एटीएसने अलीकडेच सीमा, सचिन आणि त्यांच्या कुटुंबीयांची चौकशी केली होती. त्यांना नजर कैदेत ठेवण्यात आले आहे. सचिनची घरची परिस्थीती आधीच हालाखीची आहे, त्यात आता सीमा आणि तिची चार मुलं, यांचा सांभाळ देखील सचिनलाच करायचा आहे. दोघांची चौकशी सुरु असल्याने सीमा आणि सचिनला कामासाठी घराबाहेर जात येत नाही आहे. त्यामुळे सचिनच्या हातातील कामही गेलं असून आर्थिक संकटाचा सामना करावा लागत आहे. त्यामुळे अमित जानी यांनी सीमा व सचिनला आपल्या प्रोडक्शनमध्ये काम करण्याची ऑफर दिली होती. 

सीमा-सचिनला गुजरातमध्ये नोकरीची ऑफर!
उत्तर प्रदेशातील ग्रेटर नोएडामधील रबुपूर गावात सोमवारी रात्री उशिरा पोस्टमन एक अज्ञात पत्र घेऊन सचिन-सीमा यांच्या घरी पोहोचला. अज्ञात पत्र पाहून एकच खळबळ उडाली. सीमाला पत्र उघडायचे होते, पण तिच्या सुरक्षेत तैनात असलेल्या पोलिसांनी तिला ते उघडण्यापासून रोखले. ते धमकीचे पत्र असू शकते असे पोलिसांना वाटले. यानंतर पोलिस कर्मचाऱ्यांनी आपल्या वरिष्ठ अधिकाऱ्यांना याबाबत माहिती दिली. वरिष्ठ अधिकाऱ्यांच्या आदेशानुसार हे पत्र उघडले असता, ते गुजरातमधील एका व्यावसायिकाने सचिन आणि सीमा यांना लिहिले असल्याचे आढळून आले. तीन पानी पत्रात सीमा आणि सचिन यांना गुजरातमध्ये प्रत्येकी ५० हजार रुपये पगारावर नोकरीची ऑफर देण्यात आली होती. वर्षानुसार बघितले तर त्यांना वर्षाला प्रत्येकी ६ लाख रुपयांची नोकरीची ऑफर मिळाली आहे.