महिलांची छेड काढायचे वडील, गावात होत होती बदनामी, संतापलेल्या मुलाने उचललं भयानक पाऊल

Uttar Pradesh Crime News: उत्तर प्रदेशमधील सहारनपूरमधील नागल पोलीस ठाण्याच्या हद्दीतील पिरड गावातून हत्येची धक्कादायक घटना समोर आली आहे. येथे एका तरुणाने बदनामी होत असलेल्या आपल्याच वडिलांची दोरीने गळा आवळून हत्या केली आहे.

उत्तर प्रदेशमधील सहारनपूरमधील नागल पोलीस ठाण्याच्या हद्दीतील पिरड गावातून हत्येची धक्कादायक घटना समोर आली आहे. येथे एका तरुणाने बदनामी होत असलेल्या आपल्याच वडिलांची दोरीने गळा आवळून हत्या केली आहे. एसपी (ग्रामीण) सागर जैन यांनी सांगितले की, पिरड गावातील रहिवासी असलेल्या किसन जलधार यांचा मृतदेह तीन डिसेंबर रोजी सकाळी घरातील चौपाईवर सापडला. त्यांची दोरीने गळा आवळून हत्या करण्यात आली होती. त्यानंतर पोलिसांनी अज्ञान आरोपीविरोधात गुन्हा दाखल करून तपासास सुरुवात केली.

जलधार यांची हत्या त्यांच्याच निकटवर्तीयाने केलेली असावी, असा पोलिसांना संशय होता. त्यानंतर पोलिसांनी बुधवारी जलधार यांचा मुलगा अरुण उर्फ संजय याला चंदेना कोली गावात जाणाऱ्या रस्त्यावरून अटक केली. आरोपीची कसून चौकशी केल्यावर त्याने वडिलांची हत्या केल्याचे कबुल केले. त्यानंतर पोलिसांनी आरोपीने दाखवल्याप्रमाणे हत्येसाठी वापरण्यात आलेली दोरी जप्त केली.

पोलिसांनी अधिक चौकशी केली असता आरोपी अरुण याने सांगितले की, माझा वडील जलधार सिंह यांच्यासोबत बऱ्याच दिवसांपासून वाद सुरू होता. कारण ते अनेकदा दारूच्या नशेत गावातील महिलांची छेड काढताना पकडले गेले होते. त्यामुळे आमची गावात बदनामी होत होती. त्यामुळेच मी संधी मिळताच वडिलांची हत्या केली. याबाबत सागर जैन एसपी (ग्रामीण) यांनी सांगितले की, एका व्यक्तीती हत्या झाल्याची माहिती आम्हाला ३ डिसेंबर रोजी मिळाली. त्यानंतर घटनास्थळी पोहोचून पोलिसांनी मृतदेह पोस्टमार्टेमसाठी पाठवला. पोस्टमार्टेम रिपोर्टमध्ये गळा दाबून हत्या करण्यात आल्याचे निष्पन्न झाले. त्यानंतर मृताच्या मोठ्या मुलाने दिलेल्या तक्रारीच्या आधारावर गुन्हा दाखल करण्यात आला. मृत व्यक्तीची त्याच्या तिसऱ्या क्रमांकाच्या मुलासोबत सातत्यानं भांडणं होत असल्याचं समोर आलं. तसेच मृत जलधरा सिंह हे दारूच्या नशेत महिलांची छेड काढत असल्याचे समोर आले होते. त्या दिशेने तपास करत पोलिसांनी आरोपी मुलाला बेड्या ठोकल्या.