धावत्या ट्रेनमधून पडला मुलगा, पाठोपाठ घाबरलेल्या आईने मुलीसह खाली मारली उडी

Uttar Pradesh Train Accident: अनेकदा सोबत असलेल्या व्यक्तींसोबत काही दुर्घटना घडल्यास त्यांना वाचवण्याच्या नादात सोबतची माणसंही दुर्घटनेची शिकार होतात. अशीच एक धक्कादायक घटना उत्तर प्रदेशमधील पीलिभीत येथे घडली आहे.

अनेकदा सोबत असलेल्या व्यक्तींसोबत काही दुर्घटना घडल्यास त्यांना वाचवण्याच्या नादात सोबतची माणसंही दुर्घटनेची शिकार होतात. अशीच एक धक्कादायक घटना उत्तर प्रदेशमधील पीलिभीत येथे घडली आहे. येथे एका महिलेने धावत्या ट्रेनमधून पडलेल्या तिच्या मुलाला वाचवण्याच्या नादात मुलीसह ट्रेनमधून उडी मारली.

पोलिसांनी सांगितले की, ट्रेनमधून पडलेल्या आपल्या मुलाला वाचवण्याच्या प्रयत्नात एका महिलेने तिच्या मुलीसह खाली उडी मारली. या घटनेत हे तिघेही गंभीर जखमी झाले आहेत. या महिलेचं नाव सत्यवती असं आहे. ती मुलगा निखिल आणि मुलगी सेजल यांच्यासह बिसलपूर येथून शाहजहाँपूर येथे जात होती.

याबाबत मिळालेल्या अधिन माहितीनुसार सदर ट्रेन ही एका साखर कारखान्याजवळ असलेल्या एका गेटवर पोहोचली असताना डब्याच्या दरवाजावर उभ्या असलेल्या निखिल याचा तोल गेला आणि तो खाली पडला. हे पाहून सत्यवती घाबरली आणि तिने मुलीला सोबत घेत धावत्या ट्रेनमधून खाली उडी मारली. या घटनेत हे तिघेही गंभीर जखमी झाले. मात्र सुदैवाने कुठलीही जीवितहानी झाली नाही.