अन् त्याने पोलिसांच्या देखत पत्नीच्या तोंडात टाकले विष; आर्वी येथील घटनेने खळबळ

आरोपी पतीस अटक

वर्धा : पतीच्या त्रासामुळे पोलीस कर्मचाऱ्यांना सोबत घेत, मुलाला घेण्यासाठी घरी गेलेल्या विवाहितेला विकृत पतीने शिवीगाळ करीत मारहाण करून, विषारी औषध पत्नीच्या तोंडात टाकून जीवे मारण्याचा प्रयत्न केला. ही खळबळजनक घटना आसोले ले-आउट परिसरात २४ रोजी घडली. काजल नीलेश टाके (२५) असे जखमी विवाहितेचे नाव असून, तिच्यावर आर्वी येथील सरकारी रुग्णालयात उपचार सुरू असल्याची माहिती पोलिसांनी दिली.

पोलिसांनी दिलेल्या माहितीनुसार, काजलला पती नीलेश याने मारहाण केल्याने, ती पोलीस ठाण्यात तक्रार देण्यासाठी गेली होती. आरोपी पतीने मुलाला सोबत नेऊ न दिल्याने काजलने पोलिसांना ही बाब सांगून मुलाला सोबत देण्याची विनंती तिने केली. दोन पोलीस कर्मचारी काजलसोबत तिच्या घरी मुलाला आणण्यासाठी गेले. काजलने मुलाला सोबत घेत, काही कपडे घेत असतानाच, संतापलेल्या नीलेशने काजलला पकडून मारहाण करणे सुरू केले, तसेच जबरदस्तीने तिच्या तोंडात विषारी औषध पाजून जीवे मारण्याचा प्रयत्न केला.

काजलने जोरजोरात आरडाओरड केली असता, घराबाहेर उभ्या पोलीस कर्मचाऱ्यांनी धाव घेत, आरोपी नीलेश आणि काजलच्या मुलाला पोलीस ठाण्यात आणले, तसेच जखमी काजलला तत्काळ आर्वी येथील रुग्णालयात उपचारार्थ दाखल केले. पोलिसांनी आरोपी नीलेशला अटक केली असून, जखमीवर उपचार सुरू असल्याची माहिती दिली.