दारू विक्रेत्या ‘पुष्पा’च्या घरात सापडला चोरट्या ‘वैभव’चा मृतदेह

पुष्पा किन्नाके हिच्या घराची पाहणी केली असता तेथे अज्ञात व्यक्तीचा कुजलेल्या अवस्थेत मृतदेह आढळला. पंचनामा करून मृतदेह शासकीय रुग्णालयात पाठविण्यात आल्यावर नातेवाइकांकडून मृताची ओळख पटली. पुष्पा हिच्या घरी नेहमी येणाऱ्या वैभव खडसे याचा हा मृतदेह असल्याचे लक्षात येताच अल्लीपूर पोलिसांच्याही भुवया उंचावल्या..या घटनेची नोंद अल्लीपूर पोलिसांनी घेतली असून काही व्यक्तींना पोलिसांनी चौकशीसाठी ताब्यात घेतले आहे.

लोकमत न्यूज नेटवर्क
वर्धा/अल्लीपूर : अल्लीपूर पोलीस स्टेशनच्या हद्दीत येणाऱ्या मनसावळी या गावात पुष्पा किन्नाके हिच्या घरी वैभव अरुण खडसे (३०, रा. यवतमाळ) याचा मृतदेह कुजलेल्या अवस्थेत सापडल्याने परिसरात एकच खळबळ उडाली होती.
अनैतिक संबंधातून वैभव याची हत्या करण्यात आली असावी, असा अंदाज पोलिसांकडून वर्तविला जात आहे. त्या दिशेने अल्लीपूर पोलीस सध्या तपास करीत आहे. दारू विक्रेता पुष्पा किन्नाके हिच्या कुलूपबंद घरातून दुर्गंधी येत असल्याचे लक्षात येताच परिसरातील नागरिकांनी अल्लीपूर पोलिसांना माहिती दिली. 
माहिती मिळताच पाेलिसांनी मनसावळी गाठून पुष्पा किन्नाके हिच्या घराची पाहणी केली असता तेथे अज्ञात व्यक्तीचा कुजलेल्या अवस्थेत मृतदेह आढळला. पंचनामा करून मृतदेह शासकीय रुग्णालयात पाठविण्यात आल्यावर नातेवाइकांकडून मृताची ओळख पटली. पुष्पा हिच्या घरी नेहमी येणाऱ्या वैभव खडसे याचा हा मृतदेह असल्याचे लक्षात येताच अल्लीपूर पोलिसांच्याही भुवया उंचावल्या..
या घटनेची नोंद अल्लीपूर पोलिसांनी घेतली असून काही व्यक्तींना पोलिसांनी चौकशीसाठी ताब्यात घेतले आहे. विशेष म्हणजे मृत वैभव खडसे याच्याविरुद्ध चाेरीचा गुन्हा दाखल आहे. त्याने पुष्पा किन्नाके हिच्याच घरी चोरी केल्याचा आरोप त्याच्यावर होता. याप्रकरणी पोलिसांनी वैभवला अटकही केली होती. तर आता वैभवचा मृतदेहच पुष्पाच्या घरी सापडल्याने आणि त्याची नोंद अल्लीपूर पोलिसांनी घेतली असल्याने  हे प्रकरण पुढे कुठले नवीन वळण घेते याकडे साऱ्यांचे लक्ष लागले आहे. 

मृतक हा अविवाहित
-    मृतक वैभव हा अविवाहित असून, दारू विक्रेता पुष्पा आणि वैभव यांच्यात चांगलीच जवळीक होती. वैभव हा नेहमीच पुष्पा हिच्या मनसावळी येथील घरी येत असे. शनिवारी वैभव याने त्याच्या एका मित्राला मनसावळी येथे सोडले. त्याचा मृतदेह कुजलेल्या अवस्थेत पुष्पा हिच्या घरीच सापडल्याची माहिती वैभवच्या नातेवाइकांनी दिली. या प्रकरणाची सखोल चौकशी करून दोषींवर कठोर कारवाई करावी, अशी मागणी वैभवच्या कुटुंबीयांची आहे.

वैभवने केली होती पुष्पाच्या घरी चोरी; पोलीस घेत आहेत माहिती 
-    घनिष्ट संबंध असलेल्या पुष्पाच्या घरीच वैभव याने चोरी केली होती. याप्रकरणी पोलिसांत गुन्हा दाखल झाल्यावर त्याला पोलिसांनी अटकही केली होती. 
-    तर आता दारू विक्रेत्या पुष्पाच्या घरीच वैभवचा कुजलेल्या अवस्थेत मृतदेह सापडल्याने परिसरात एकच खळबळ उडाली आहे. 
-    वैभव याचा मृत्यू नेमका कशामुळे झाला या बाबतची अधिकची माहितीच सध्या अल्लीपूर पोलीस घेत आहेत.

पुष्पा किन्नाके हिच्या घरातून दुर्गंधी येत असल्याची माहिती मिळताच मनसावळी गाठून पुष्पाच्या घराची पाहणी केली असता अज्ञात व्यक्तीचा कुजलेल्या अवस्थेतील मृतदेह तेथे सापडला. पंचनामा करून मृतदेह शवविच्छेदनासाठी पाठविण्यात आला. मृतकाची ओळख पटली असून, वैभव अरुण खडसे (रा. यवतमाळ) असे मृतकाचे नाव आहे. या प्रकरणाचा सखोेल तपास सुरू आहे.
- सुनील गाडे, ठाणेदार, अल्लीपूर