दोन अपघातात दोन ठार; एक गंभीर

समुद्रपूर तालुक्यातील हळदगाव शिवारात भरधाव ट्रकने उभ्या ट्रकला धडक दिल्याने एकाचा मृत्यू झाला व एक जण गंभीर जखमी झाला. तर आर्वी तालुक्यातील मजरा येथे भरधाव ट्रकने बैलगाडीला धडक दिली. यात एक शेतकरी ठार झाला.

ठळक मुद्देहळदगाव आणि मजरा शिवारातील घटना

लोकमत न्यूज नेटवर्क
समुद्रपूर/आकोली : समुद्रपूर तालुक्यातील हळदगाव शिवारात भरधाव ट्रकने उभ्या ट्रकला धडक दिल्याने एकाचा मृत्यू झाला व एक जण गंभीर जखमी झाला. तर आर्वी तालुक्यातील मजरा येथे भरधाव ट्रकने बैलगाडीला धडक दिली. यात एक शेतकरी ठार झाला. सदर दोन्ही अपघातांची नोंद पोलिसांनी घेतली आहे.
प्राप्त माहितीनुसार, जामकडून नागपूरच्या दिशेने जाणाऱ्या ए. पी. १६ वाय ३७९९ क्रमांकाच्या ट्रकचा हाऊजिंग जॉईट तुटल्याने हा ट्रक राष्ट्रीय महामार्ग ७ वर हळदगाव शिवारात रस्त्याच्याकडेला उभा होता. ट्रक चालक मारोती कोल्हे (३४) रा. ठिगुडी आसिफाबाद, तेलंगणा आणि क्लिनर सुरेश वाढई हे वाहनाला नेमके काय झाले ते कसे व्यवस्थित करता येईल यासाठी वाहनाखाली उतरुन प्रयत्न करीत असतानाच मागाहून येणाºया एम. एच. ३४ बी. जी. ३५९४ क्रमांकाच्या भरधाव ट्रकने या ट्रकला जोरदार धडक दिली. यात क्लिनर सुरेश वाढई हा जागीच ठार झाला तर नादुरूस्त ट्रकचा चालक मारोती कोल्हे हे गंभीर जखमी झाले. हा अपघात इतका जोरदार होता की धडक होताच वाहन रस्ता दुभाजकावर चढले. अपघाताची माहिती मिळताच पोलिसांनी घटनास्थळ गाठून जखमीला मिळेल त्या वाहनाने सेवाग्राम येथील रुग्णालयाकडे रवाना केले. या घटनेची समुद्रपूर पोलिसांनी नोंद घेतली असून पुढील तपास ठाणेदार प्रविण मुंडे यांच्या मार्गदर्शनात विनायक खेकडे, मनोहर मुडे, विलास नेहारे, राहुल पुरी, घवघवे करीत आहेत. तर सेलू तालुक्यातील आकोली नजीकच्या मजरा शिवारात बस स्थानकासमोर भरधाव ट्रकने बैलबंडीला धडक दिली. यात शेतकरी भिकुजी उकंडराव ढवळे (५५) यांचा जागीच मृत्यू झाला. शेतकरी भिकूजी हे नेहमीप्रमाणे सकाळी भाजी-भाकरची शिदोरी सोबत घेवून बैलगाडीने शेतात जात होते. बैलगाडी मजरा बस स्थानका जवळ येताच मागाहून येणाऱ्यां एच. आर. ०१ जी. एफ. ८५६३ क्रमांकाच्या ट्रकने बैलगाडीला जबर धडक दिली. यात शेतकरी भिकुजी यांचा घटनास्थळीच मृत्यू झाला. शिवाय बैलगाडीचा चुराडा होत दोन्ही बैलही जखमी झाले. अपघाताची माहिती मिळताच पोलीस जमादार प्रेमराज बावणे यांनी आपल्या सहकार्यांसह घटनास्थळ गाठून पंचनामा केला. या प्र्रकरणी आरोपी ट्रक चालक मुंटाबीर रजाबीर रुजाहसन रा. समनपूर जि. सारंगपूर याच्याविरुद्ध गुन्हा दाखल करून त्याला अटक केली आहे. हळदगावच्या घटनेला समुद्रपूर तर मजरा येथील घटनेचा पुढील तपास खरांगणा पोलीस करीत आहे.