धक्कादायक! पत्नीने पतीलाच करायला लावला अल्पवयीन मुलीवर बलात्कार

आर्वी तालुक्यातील एका गावात महिलेनं आपल्या पतीला गावातील एका अल्पवयीन मुलीवर डोळ्यादेखत बळजबरी बलात्कार करायला लावल्याची धक्कादायक घटना उघडकीस आली आहे.

ठळक मुद्देसूडापोटी कृत्यआर्वी तालुक्यातील घटनाआरोपी दाम्पत्य पोलिसांच्या ताब्यात

देऊरवाडा/आर्वी : संशयी वृत्तीच्या पत्नीने थेट आपल्या पतीला गावातीलच एका १४ वर्षीय मुलीवर डोळ्यादेखत बळजबरी बलात्कार करावयास लावल्याची धक्कादायक घटना तक्रारीनंतर रविवारी उघडकीस आली आहे. या प्रकरणी तक्रारीवरून आर्वी पोलीस ठाण्यात गुन्ह्याची नोंद घेण्यात आली असून, आरोपी दाम्पत्यास पोलिसांनी ताब्यात घेतले आहे. मारुती मारबदे तसेच प्रिया मारुती मारबदे दोन्ही रा. (मोटोडा) बेनोडा, अशी आरोपींची नावे आहेत.

अल्पवयीन पीडिता ही घरी एकटी हजर असताना आरोपी प्रिया हिने तिला घरी बोलावले. पीडिता ही आरोपीच्या घरी येताच आरोपी प्रिया हिने तिला तू मारुती याच्यासोबत लग्न कर, असे म्हणत घराचा दरवाजा बंद करून घराबाहेर निघून गेली. दरम्यान, आरोपी मारुती याने पीडिता ही एकटी असल्याचे हेरून तिच्यावर जबरी बलात्कार केला. काही वेळानंतर आरोपी प्रिया ही घरी परतली. त्यानंतर तिने पती मारुती याला पीडितेवर तिच्या डोळ्यासमोरच बळजबरी शारीरिक संबंध प्रस्थापित करावयास लावले. आरोपी इतक्यावरच थांबले नाहीत तर त्यांनी सदर प्रकाराची माहिती कुणाला दिल्यास जीवानिशी ठार करण्याची धमकी पीडितेला दिली.

आरोपींच्या तावडीतून कशीबशी सुटका केलेल्या पीडितेने घरी पोहोचल्यावर संपूर्ण प्रकाराची माहिती कुटुंबीयांना दिली. त्यानंतर पीडिता व तिच्या कुटुंबीयांनी पोलीस स्टेशन गाठून तक्रार नोंदविली. तक्रारीची दखल घेत पोलिसांनीही आरोपीविरुद्ध बाल लैंगिक अत्याचार प्रतिबंधक कायदा तसेच भादंविच्या विविध कलमान्वये गुन्हा दाखल करून त्यांना ताब्यात घेतले आहे. पुढील तपास सुरू आहे.

अल्पवयीन मुलीवरील बलात्कार प्रकरणी आरोपी दाम्पत्याविरुद्ध बाल लैंगिक अत्याचार प्रतिबंधक कायद्याच्या कलम ६ तसेच भादंविच्या कलम ३७६ (३), ७६ (२) (एन), ३६६ (अ.), ५०६, ३४ अन्वये गुन्हा दाखल करण्यात आला आहे. या प्रकरणातील आरोपी दाम्पत्याला ताब्यात घेण्यात आले आहे. पुढील तपास सुरू आहे.

- भानुदास पिदूरकर, ठाणेदार, आर्वी