१५ वर्षाची मुलगी नाल्यात गेली वाहून, नालासोपाऱ्याच्या धानिवबाग परिसरातील घटना

मागील १५ दिवसांतील ही दुसरी घटना घडल्याने उघड्या नाल्याचा प्रश्न ऐरणीवर आला आहे. 

नालासोपारा - धानिवबाग परिसरातील उघड्या नाल्यात मंगळवारी दुपारी एक १५ वर्षाची मुलगी वाहून गेल्याची धक्कादायक घटना घडली आहे. पेल्हार पोलीस अग्निशमन दलाच्या जवानांनी घटनास्थळी शोधमोहीम सुरू केली आहे, मात्र अद्याप या मुलीचा काहीही पत्ता लागलेला नाही. मागील १५ दिवसांतील ही दुसरी घटना घडल्याने उघड्या नाल्याचा प्रश्न ऐरणीवर आला आहे. 

धानिवबागच्या सिद्धिविनायक चाळीत राहणाऱ्या दीक्षा यादव (१५) ही अल्पवयीन मुलगी मंगळवारी दुपारी दीड वाजण्याच्या सुमारास मुसळधार पावसात घराबाहेर शौचालयास गेल्याचे तिच्या घरच्यांनी सांगितले. याच वेळी उघड्या नाल्याजवळ तिचा पाय घसरून ती नाल्यात पडली व जोरदार पाण्याच्या प्रवाहात वाहून गेली. मंगळवारी सकाळपासून वसई विरारमध्ये जोरदार वाऱ्यासह पाऊस पडत आहे. या परिसरात राहणाऱ्या नागरिकांना दरवर्षी पावसाचा फटका बसत आहे. दिवसेंदिवस नालासोपाऱ्यात उघडे नाले लोकांसाठी जीवघेणे ठरत आहेत.