धक्कादायक! मागील भांडणाचा राग मनात धरून चाकूने जीवघेणा हल्ला

आरोपीने त्याच्या छातीवर आणि पोटावर चाकूने वार केला आहे तर त्याच्या पत्नी व मुलाने ठोशाबुक्यांनी मारहाण केली आहे.

नालासोपारा (मंगेश कराळे) : विरारच्या साईनाथ नाका येथील एम जी एम शाळेसमोरील झोपडपट्टीत शुक्रवारी संध्याकाळी मागील भांडणाच्या रागातून एका ३० वर्षीय तरुणावर चाकूने जीवघेणा हल्ला झाल्याची घटना घडली आहे. आरोपीने त्याच्या छातीवर आणि पोटावर चाकूने वार केला आहे तर त्याच्या पत्नी व मुलाने ठोशाबुक्यांनी मारहाण केली आहे. जखमीला पुढील उपचारासाठी जवळच्या हॉस्पिटलमध्ये भर्ती करण्यात आले आहे. जखमीच्या भावाने विरार पोलीस ठाण्यात तक्रार देऊन तीन आरोपी विरोधात जीवे ठार मारण्याचा प्रयत्न केल्याप्रकरणी गुन्हा दाखल केला आहे.

पोलिसांकडून मिळालेल्या माहितीनुसार, साईनाथ नाका येथील झोपडपट्टीत राहणाऱ्या गोविंद पोपट कुमरखानिया (३०) याचे गुरुवारी आरोपी संजय खावरीया (४०) याच्यासोबत गुरुवारी भांडण झाले होते. याच भांडणाच्या रागातून शुक्रवारी संध्याकाळी साडे सात वाजण्याच्या सुमारास आरोपीने गोविंदच्या पोटावर आणि छातीवर वार केले. आरोपीच्या पत्नी व मुलाने ठोशाबुक्यांनी मारहाण केली आहे. विरार पोलिसांनी गुन्हा दाखल केला असून गुन्ह्याचा पुढील तपास करत आहे.