शॉर्ट सर्किटमुळे घरातील टीव्हीचा स्फोट; ८ वर्षीय मुलगा घरात एकटा असताना घडली घटना 

Short Circuit : नालासोपाऱ्याच्या विजय नगर परीसरातील घटना 

नालासोपारा (मंगेश कराळे) :- विजय नगर येथील एका घरात शॉर्ट सर्किटने टीव्ही जळाल्याची घटना रविवारी घडली आहे. या घटनेत घरात कुलूप बंद अवस्थेत असलेल्या ८ वर्षीय मुलाचे प्राण वाचवण्यात यश आले. शिवधाम बिल्डींगमध्ये भाडे तत्वावर गोविंद विश्वकर्मा हे आपल्या कुटुंबासह राहतात. रविवारी दुपारी साडे बारा वाजण्याच्या सुमारास त्यांची पत्नी आपल्या ८ वर्षीय मुलाला घरात लॉक करून बाहेर गेल्या होत्या.

यावेळी त्यांचा मुलगा मोबाईलवर खेळत होता. मात्र टीव्हीचे कनेक्शन सुरू असल्याने त्यांच्या टिव्हीत अचानक शॉर्ट सर्किटमुळे स्फोट झाला व घरात धूरच धूर पसरला. घरातील मुलाने खिडकीतून आरडा ओरड करून रहिवाशांना हा प्रकार सांगितल्यानंतर त्यांनी प्रसंगावधन दाखवत घराचे कुलूप तोडले व मुलाची सुटका केली. या घटनेत टीव्ही व घरातील वायरिंगचे मोठे नुकसान झाले आहे. पोलिस व अग्निशमन विभागाने घटनास्थळी पोहचून या घटनेची नोंद केली असून अधिक तपास केला जात आहे.