बविआच्या शहराध्यक्षांवर हल्ला

वाडा ग्रामपंचायतीचे सदस्य व बहुजन विकास आघाडीचे शहर अध्यक्ष देवेंद्र रघुनाथ भानुशाली व त्यांची मुलगी ख्याती यांच्यावर

वाडा : वाडा ग्रामपंचायतीचे सदस्य व बहुजन विकास आघाडीचे शहर अध्यक्ष देवेंद्र रघुनाथ भानुशाली व त्यांची मुलगी ख्याती यांच्यावर बुधवारी सकाळी दहाच्या सुमारास राकेश जैन व त्यांच्या कुटुंबियांनी घरात शिरुन रॉड व दांडक्यांनी हल्ला केला. त्यात हे दोघे गंभीर जखमी झाले. त्यांच्यावर वाडा ग्रामीण रुग्णालयात उपचार सुरु आहेत. राकेश जैन, वंदना जैन, जितेंद्र जैन व राजेद्र जैन यांना अटक करण्यात आली असून भाडोत्री गुंड पसार झाले आहेत. देवेंद्र भानुशाली व राकेश जैन हे दोघेही फर्निचर व भांड्यांचे व्यापारी आहेत. दोघांचेही व्यवसाय वाडा बाजारपेठेत असून बाजारपेठेतील एका जागेवरुन या दोघांमध्ये गेल्या अनेक वर्षांपासून वाद आहे. तो न्यायप्रविष्ट असतांनाही आज ही मारहाण झाली. (वार्ताहर)