वसई राष्ट्रीय महामार्गावर कंटेनरवर ऑईल टँकरची धडक; दोन्ही गाड्या जळून खाक

Vasai : या भीषण अपघात व जळीत घटनेत ऑईल टँकरचा चालक मात्र गंभीर जखमी झाला असून त्याच्या पायाला दुखापत झाली आहे.

- आशिष राणे

वसई : मुंबई - अहमदाबाद राष्ट्रीय महामार्गावरिल पेल्हार फाट्याजवळ ऑईल टँकर व कंटेनरचा अपघात होऊन दोन्ही गाड्यांना भीषण आग लागल्याची घटना सोमवार दि 14 जून रोजी पहाटे 4 च्या सुमारास घडली आहे. दरम्यान, या भीषण अपघात व जळीत घटनेत ऑईल टँकरचा चालक मात्र गंभीर जखमी झाला असून त्याच्या पायाला दुखापत झाली आहे.

अधिक माहितीनुसार, सोमवारी पहाटे वसई पूर्वेस पेल्हार फाट्यावरील गुजरात लेन च्या दिशेने एक मालवाहू कंटेनर जात असताना मागून भरघाव वेगात येणाऱ्या एका ऑईल टँकरने पुढे ओव्हर टेकच्या नादात या कंटेनरला जोरदार धडक दिली आणि बघता बघता या दोन्ही गाड्यांनी पेट घेतला.

परिणामी, याठिकाणी तात्काळ दोन्ही गाड्यांची आग आटोक्यात आणण्यासाठी वसई विरार महानगरपालिका अग्निशमन दलाच्या विरार पूर्व पश्चिम व नालासोपारा येथील बंब बोलवण्यात आले. तर जवानांनी दोन तासांचे अथक प्रयत्न करीत ही आग आटोक्यात आणली. या अपघातात कुठल्याही प्रकारची जिवितहानी झाली नाही, मात्र ऑईल टँकर चालक गंभीर जखमी झाला आहे.