विद्यार्थीनीवर वार करणाऱ्यास अटक

माहीमच्या भुवनेश किर्तने विद्यालयातील १० वी इयत्तेत शिकणाऱ्या एका आदिवासी विद्यार्थीनीवर एकतर्फी पे्रमातून ब्लेडने वार करणाऱ्या माथेफिरूच्या मुसक्या आवळून सातपाटी सागरी

पालघर : माहीमच्या भुवनेश किर्तने विद्यालयातील १० वी इयत्तेत शिकणाऱ्या एका आदिवासी विद्यार्थीनीवर एकतर्फी पे्रमातून ब्लेडने वार करणाऱ्या माथेफिरूच्या मुसक्या आवळून सातपाटी सागरी पो. स्टे. चे सहा. पो. नि. भुजंग हातमोडे यांनी काल रात्री त्याला अटक केली.
वडराईच्या रावळेपाडा येथे राहणारी विद्यार्थीनीवर काल १० वी चा पेपर देऊन बाहेर आल्यानंतर माहीम टेंभी येथे राहणाऱ्या कल्पेश भावर (२६) या तरूणाने ब्लेडच्या सहाय्याने जीवघेणा वार करीत तिच्या डाव्या हाताच्या नसा कापण्याचा प्रयत्न केला होता व फरार झाला होता.
विद्यार्थीनीने आरोपीचे केलेले वर्णन व पोलीसांनी सीसीटीव्हीवरचे फुटेज पाहिल्यानंतर कल्पेश नावाच्या व वर्णनामध्ये नमूद केलेल्या तीन तरूणांना ताब्यात घेतले होते. त्यांच्याकडून कसून चौकशी केली असता सर्वांनी आपला या गुन्ह्याशी संबंध नसल्याचे सांगितले. परंतु जखमी विद्यार्थीनीने या तीन्ही तरूणामधील आरोपी कल्पेश भावर याला ओळखले. सातपाटी सागरी पोलीसांनी आरोपी विरोधात भादवि कलम ३२४, ३५४ (ड) व पास्को अंतर्गत गुन्हा नोंदविला होता. आज त्याला पालघरच्या न्यायालयात हजर केले असता न्यायालयाने आरोपीला न्यायालयीन कोठडीत ठेवण्याचे आदेश दिले आहेत.
(वार्ताहर)