वसईत त्रिशंकू ; पं. समितीची चावी भाजपकडे, जिल्हा परिषद गटात भाजपने अर्नाळ्यात उघडले खाते

विधानसभा निवडणुकीत देदीप्यमान यश प्राप्त करणाऱ्या बहुजन विकास आघाडीला या जिल्हा परिषद आणि पंचायत समिती निवडणुकीत मात्र कमालीचे बॅकफूटवर जावे लागले आहे.

सुनील घरत 
पारोळ : विधानसभा निवडणुकीत देदीप्यमान यश प्राप्त करणाऱ्या बहुजन विकास आघाडीला या जिल्हा परिषद आणि पंचायत समिती निवडणुकीत मात्र कमालीचे बॅकफूटवर जावे लागले आहे. वसई पंचायत समितीवर निर्विवाद वर्चस्व असलेल्या बविआला या वेळी मात्र केवळ ३ जागांवर विजय मिळाला आहे. दुसरीकडे शिवसेनेनेदेखील चांगली लढत देत पं. समितीच्या ३ जागांवर विजय मिळवला आहे. तर भाजपनेही स्वबळावर बविआ तसेच शिवसेनेला मजबूत टक्कर देऊन पंचायत समितीच्या २ जागांवर आपले उमेदवार निवडून आणले आहेत. दुसरीकडे जिल्हा परिषदेच्या एकूण ४ गटांपैकी २ गट बविआकडे, १ गट शिवसेनेकडे आणि १ गट भाजपने राखला. बुधवारच्या निवडणूक निकालानंतर वसई तालुक्यातील बहुजन विकास आघाडीच्या राजकीय वर्चस्वाला मोठा धक्का बसला आहे. पंचायत समितीतील सत्तेसाठी बविआला भाजपची साथ घ्यावी लागणार आहे. मात्र, भाजप बविआला साथ देतो की शिवसेनेला ते पाहणे रंजक ठरणार आहे.
बहुजन विकास आघाडीने झंझावाती प्रचार केला होता. मात्र, मतदारांनी बहुजन विकास आघाडीच्या तिन्ही उमेदवारांना नाकारले. सुरूवातीपासूनच शिवसेनेच्या तिन्ही उमेदवारांनी मताधिक्य घेऊन विजयाला गवसणी घातली. भाताणे गटात बविआच्या अरूण दामोदर पाटील यांना शिवसेना-श्रमजीवीच्या गणेश यशवंत उंबरसाडा यांनी पराभवाचा धक्का दिला. मेढे गणातून शिवसेना-श्रमजीवीच्या रूपेश वामन पाटील यांनी बविआच्या रूपेश वसंत पाटील यांना १ हजारांच्या मताधिक्याने पराभूत केले. येथे बविआला नाराज कार्यकर्त्यांचा फटका बसला, असे कार्यकर्त्यांचे म्हणणे आहे. तर भाताणे गणात शिवसेनेच्या आनंद पाटील यांनी बविआच्या प्रणय कासार यांना पराभवाचा धक्का दिला. भाताणे गटात असलेली बहुजन विकास आघाडीची राजकीय ताकद पाहता तेथे शिवसेना-श्रमजीवी संघटनेने मिळवलेले यश बविआच्या स्थानिक कार्यकर्त्यांना आत्मचिंतन करण्यास भाग पाडते.
दुसरीकडे तिल्हेर गटात शिवसेना-श्रमजीवी संघटनेचे वर्चस्व असतानाही बहुजन विकास आघाडीचे कृष्णा माळी यांना केवळ १२५ मताधिक्याने विजय मिळाला, तर श्रमजीवी संघटनेचा मातब्बर चेहरा सुरेश रेंजड यांना पराभवाचा धक्का बसला. चंद्रपाडा गणातही बविआच्या शुभांगी तुंबडा यांनी शिवसेनेला नामोहरम करत विजय संपादन केला. तसेच तिल्हेर गणात भाजप-अपक्ष उमेदवारांच्या आव्हानानंतरही शिवसेनेच्या अनुजा अजय पाटील यांनी विजय संपादन केला. त्यांनी बविआच्या दीक्षा दौलत पवार यांचा पराभव केला. वासळई गणात बविआच्या सविता पाटील यांनी तर कळंब गणात भाजपला आधीच बिनविरोध विजय मिळाला आहे. अर्नाळा किल्ला गणात भाजपच्या वनिता तांडेल तर अर्नाळा गणात बविआचे सुनिल अंकारे विजयी झाले.

>पंचायत समिती, जिल्हा परिषद निवडणुकीतील विजयी शिलेदार
पालघर जिल्हा परिषद
भाताणे - ५४ गणेश उंबरसाडा (शिवसेना )
चंद्रपाडा- ५५ कृष्णा माळी (बविआ)
अर्नाळा- ५६ आशा चव्हाण (भाजप )
कळंब-५७ नीलिमा भोवर (बविआ) (बिनविरोध)
>वसई पंचायत समिती
भाताणे : १०७ आनंद पाटील (शिवसेना )
मेढे : १०८ रुपेश पाटील (शिवसेना)
तिल्हेर : १०९ अनुजा पाटील (शिवसेना)
चंद्रपाडा : ११० शुभांगी तुंबडा (बविआ )
अर्नाळा : १११ सुनील अंकारे (बविआ)
अर्नाळा कि. : ११२ वनिता तांडेल (भाजप )
कळंब : ११३ अनिता जाधव भाजप (बिनविरोध)
वासळई : ११४ सविता पाटील (बविआ)
>पंचायत समितीत भाजपचा आधार
वसई पंचायत समितीच्या ८ गणांपैकी बविआ - ३, शिवसेना - ३ आणि भाजप - २ अशी स्थिती आहे. याआधी बहुजन विकास आघाडीच्या हातात सत्तेच्या चाव्या होत्या. आता मात्र बविआ आणि शिवसेना या दोन्ही पक्षांना सत्तेसाठी भाजपचा आधार मिळणार असल्याचे चित्र दिसते आहे. मात्र, भाजप नेमके कोणाच्या सोबत जाणे पसंत करतो ते पाहणे रंजक ठरणार आहे.