कौटुंबिक वादातून जावेचा गर्भपात घडवून आणण्यासाठी जादूटोणा; विरार येथील धक्कादायक घटना

याप्रकरणी आरोपी महिलेच्या पतीच्या तक्रारीवरून पत्नी व भगत विरोधात मांडवी पोलीस ठाण्यात मंगळवारी गुन्हा दाखल करण्यात आला आहे. 

मंगेश कराळे -

नालासोपारा - कौटुंबिक वादातून जावेचा गर्भपात घडवून आणण्यासाठी जादूटोणा करण्यात आल्याचा अघोरी आणि धक्कादायक प्रकार विरारमध्ये घडला आहे. याप्रकरणी आरोपी महिलेच्या पतीच्या तक्रारीवरून पत्नी व भगत विरोधात मांडवी पोलीस ठाण्यात मंगळवारी गुन्हा दाखल करण्यात आला आहे. 

विरार येथील गावात राहणाऱ्या सदर आरोपी महिलेचे घरात जाऊसोबत कौटुंबिक वाद सुरू होता. आरोपी महिलेच्या जाऊला दिवस गेल्याचे लक्षात येताच वैयक्तिक आकसापोटी महिलेने १२ ऑगस्टला संध्याकाळी पाचच्या सुमारास परिसरातील अघोरी विद्या व जादूटोणा करणाऱ्या भगताला फोनवरून जाऊचा गर्भपात घडवून आणण्यासाठी जादूटोणा करण्यास सांगत मोबाईल वरून भक्ताच्या बँक खात्यात चार हजार रुपये ऑनलाईनने पाठवले होते. आरोपी महिलेच्या पतीच्या हि बाब लक्षात येताच पत्नीने वैयक्तिक वादात अघोरी व अनिष्ठ प्रथेचा वापर केल्याप्रकरणी मंगळवारी मांडवी पोलीस ठाण्यात तक्रार दाखल केली आहे. पोलिसांनी याप्रकरणी महाराष्ट्र नरबळी आणि इतर अमानुष अनिष्ट व अघोरी प्रथा व जादूटोणा प्रतिबंधक कलमाखाली दोघांविरोधात गुन्हा दाखल केला आहे. मांडवी पोलिस गुन्ह्याचा पुढील तपास करत आहेत.