आणखी ३ कोरोनामुक्त; ३ पॉझिटिव्ह!

जिल्ह्यात कोरोना रुग्णांची संख्या कमी होत असल्याने, जिल्हावासीयांना दिलासा मिळत आहे. नव्याने कोरोना रुग्ण आढळून येण्याचे प्रमाण अतिशय घटले असून, कोरोनावर मात करणाऱ्यांची संख्याही वाढत असल्याचे चित्र आहे. मंगळवारी नव्याने ३ रुग्ण आढळून आले, तर ३ रुग्णांनी कोरोनावर मात केल्याने त्यांना डिस्चार्ज देण्यात आला. रिसोड व मालेगाव तालु्क्याचा अपवाद वगळता उर्वरित चार तालुक्यात एकही रुग्ण आढळून आला नाही. आतापर्यंत जिल्ह्यात ४१,६४८ रुग्ण आढळून आले आहेत. यापैकी ४०,९७६ रुग्णांनी कोरोनावर मात केली, तर आतापर्यंंत ६२२ जणांचा मृत्यू झाला. कोरोनाची दुसरी लाट ओसरत असली, तरी तिसऱ्या लाटेची शक्यता वर्तविण्यात येत असल्याने नागरिकांनी काळजी घ्यावी, असे आवाहन जिल्हा प्रशासन व आरोग्य विभागाने केले.

००००

चार तालुके निरंक

मंगळवारच्या अहवालानुसार, वाशिम, मंगरुळपीर, मानोरा व कारंजा तालुक्यात, तसेच मालेगाव व रिसोड शहरात एकही रुग्ण आढळून आला नाही. मंगळवारीही जिल्ह्यातील एकाही प्रमुख शहरात कोरोना रुग्ण आढळून आला नसल्याने शहरवासीयांना दिलासा मिळाला आहे.

०००००००

४९ सक्रिय रुग्ण

मंगळवारच्या अहवालानुसार, नव्याने ३ रुग्ण आढळून आले, तर ३ रुग्णांनी कोरोनावर मात केली आहे. सध्या सरकारी कोविड केअर सेंटर, कोविड हॉस्पिटल, गृहविलगीकरणात असे एकूण ४९ रुग्ण सक्रिय आहेत.