कोरोनाचा धोका अजून टळला नाही, खबरदारी घ्यावी -वसुमना पंत

प्रश्न : जिल्हा परिषदेतर्फे ग्रामीण भागात काय उपाययोजना करण्यात आल्या?

ग्रामीण भागात कोरोना चाचण्यांची संख्या वाढविण्यात आली आहे. संस्थात्मक विलगीकरणाची सुविधा उपलब्ध केली जात आहे. पावसाळ्याचे दिवस लक्षता घेता ग्रामसेवकांनी मुख्यालयी राहावे, अशा सूचना दिलेल्या आहेत.

प्रश्न : कोरोनामुळे विविध योजना राबविताना काय अडचणी येतात?

कोरोनाकाळात प्रतिबंधात्मक उपाययोजनांची प्रभावी अंमलबजावणी करण्याला सर्वाधिक प्राधान्य आहे. याशिवाय ग्रामीण भागातील विकासात्मक कामेही रखडणार नाहीत, याचीही दक्षता घेतली जाते. कोरोनाविषयक नियमाचे पालन करीत ग्रामीण भागात शासनाच्या योजना पोहोचविण्याचा प्रयत्न सुरू आहे.

प्रश्न : अधिकारी, कर्मचाऱ्यांची रिक्त पदे मोठ्या संख्येत आहेत. याबाबत शासनस्तरावर पाठपुरावा सुरू आहे का?

जिल्हा परिषदेत अधिकारी, कर्मचाऱ्यांची महत्त्वाची पदे रिक्त आहेत. उपलब्ध मनुष्यबळानुसार दर्जेदार सेवा देण्याचा प्रयत्न सुरू आहे. अधिकाऱ्यांची महत्त्वाची पदे भरण्यात यावीत याबाबत वरिष्ठांकडे पाठपुरावा केला जातो.

प्रश्न : ग्रामीण भागातील कोरोना लसीकरणाबाबत काय सांगाल?

कोरोनाला हद्दपार करण्यासाठी लसीकरण हा प्रभावी उपाय आहे. कोरोना लस ही पूर्णत: सुरक्षित व प्रभावी आहे. त्यामुळे नागरिकांनी कोणतेही गैरसमज न ठेवता, कोणत्याही अफवांवर विश्वास न ठेवता कोरोना प्रतिबंधक लस घ्यावी. ग्रामीण भागात लसीकरण शिबिर घेण्यात येत आहेत.