८४ हजार शेतकऱ्यांना पीककर्ज वाटप

गतवर्षातील नैसर्गिक आपत्तीमुळे झालेल्या पीक नुकसानातून स्वत:ला सावरत यंदा शेतकऱ्यांनी नव्या जोमाने खरीप हंगामाची तयारी केली. शेती मशागत, बियाणे, खते खरेदीसाठी शेतकऱ्यांना पीककर्जाची आवश्यकता असते. यंदा चार लाख हेक्टरवर खरिपाची पेरणी झालेली असून, सर्वाधिक पेरा सोयाबीनचा आहे. दरम्यान, शेती मशागतीसाठी पीककर्ज काढताना शेतकऱ्यांची गैरसोय होऊ नये म्हणून यंदा कोरोनाकाळातही बँक सुरू ठेवण्यास मुभा होती. पीककर्जासाठी शेतकऱ्यांना बँकेसमोर रांगेत उभे राहावे लागले. यंदाही राष्ट्रीयीकृत बँकांपेक्षा जिल्हा मध्यवर्ती सहकारी बँकेने पीककर्ज वितरणात आघाडी घेतली आहे. ३५ टक्के राष्ट्रीयीकृत बँकांचा अपवाद वगळता उर्वरित बँकांनी मात्र पीककर्ज वितरणात हात आखडता घेतल्याचे दिसून येते. गतवर्षी १५ जुलैपर्यंत ७२ हजार २० शेतकऱ्यांना सुमारे ५१६ कोटी ७७ लाख रुपये पीककर्ज वाटप करण्यात आले होते. यंदा आतापर्यंत ८४ हजार शेतकऱ्यांना ६८७ कोटी रुपयांचे पीककर्जाचे वितरण करण्यात आले आहे. गतवर्षीच्या तुलनेत यंदा पीककर्ज वितरणाच्या टक्केवारीत वाढ असल्याचे दिसून येते.

000000

गतवर्षी झालेले पीककर्ज वाटप - ५१६ कोटी ७७ लाख

यंदा झालेले पीककर्ज वाटप - ६८७ कोटी

०००

गतवर्षी पीककर्जाचा लाभ घेतलेले शेतकरी - ७२०२०

यंदा पीककर्जाचा लाभ घेतलेले शेतकरी - ८४०००

००००

जिल्हा मध्यवर्ती बँक आघाडीवर !

अन्य बँकांच्या तुलनेत दरवर्षीच जिल्हा मध्यवर्ती बँक उद्दिष्टापेक्षा जास्त पीककर्ज वाटप करीत असते. यंदाही जिल्हा मध्यवर्ती सहकारी बँकेने पीककर्ज वितरणात आघाडी घेतली आहे.