अनोळखी माणसाला मोबाइल देऊ नका; क्षणात बॅंकखाते होऊ शकते साफ !

वाशिम : अनोळखी माणसाने कॉलसाठी मोबाइल मागितल्यास देऊ नका ! या माध्यमातून ओटीपी मिळवून बॅंक खात्यातील जमा रक्कम क्षणात गायब केली जाऊ शकते. अशाप्रकारे फसवणूक झाल्याच्या घटना अलीकडच्या काळात वाढल्या आहेत. त्यामुळे नागरिकांनी सावधानता बाळगणे आवश्यक आहे.

आजघडीला जवळपास प्रत्येकाकडेच ॲन्ड्राॅइड मोबाइल असून, दहा अंकी मोबाइल क्रमांक बॅंक खात्याशी जोडलेला आहे. ऑनलाइन पद्धतीने पैशांची देवाण-घेवाण करायची असल्यास खबरदारी म्हणून ओटीपी मागविण्यात येतो. तो कोणालाही ‘शेअर’ करू नये, असे आवाहन वारंवार केले जाते. त्यामुळे कुठल्याही अनोळखी माणसाच्या हातात मोबाइल दिल्यास तुमची नजर चुकवून तो व्यक्ती क्षणात बॅंकखाते साफ करू शकतो. त्यामुळे सतर्क राहणे आवश्यक झाले आहे.

.......................

ओटीपी मिळविण्यासाठी अशी केली जाऊ शकते फसवणूक

कॉल करण्यासाठी मोबाइल घेऊन -

अनोळखी व्यक्ती कॉल करण्यासाठी मोबाइल घेऊन आणि तत्काळ ओटीपी मिळवून बॅंकेतील रकमेवर डल्ला मारू शकते.

लॉटरी लागली आहे असे सांगून -

तुम्हाला अमूक रकमेची लॉटरी लागली आहे आणि त्यासाठी ओटीपी सांगा, अशी बतावणी करून फसवणूक होऊ शकते.

वेगळी लिंक पाठवून -

तुमच्या मोबाइलवर मॅसेजद्वारे वेगळी लिंक पाठवून पैशाचे आमिष दाखविले जाऊ शकते. त्याद्वारे ओटीपीची मागणी होऊ शकते.

केवायसीसाठी आवश्यक असे सांगून -

बॅंक अधिकाऱ्याच्या नावाने फोन करून केवायसीसाठी ओटीपी आवश्यक असल्याची बतावणी होऊ शकते.

............

ही घ्या काळजी

१) आपला ओटीपी कोणतीही बॅंक किंवा शासकीय अधिकारी कधीच मागत नाही. त्यामुळे ओटीपीसाठी कोणी काहीही कारण सांगतले तर तो कोणालाच शेअर करू नये.

२) एखादी अडचणीत असलेली अनोळखी व्यक्ती फोन लावण्यासाठी मोबाइल मागत असेल तर त्याच्या प्रत्येक हालचालीवर पूर्णत: लक्ष ठेवायला हवे.

३) बॅंकेतील रकमेवर वक्रदृष्टी ठेवून असलेले ठग लाखो रुपयांचे आमिष दाखवून बॅंक डिटेल्स, ओटीपीची मागणी करतात. अशावेळी त्यांना प्रतिसाद देऊ नये.

...................

कोट :

मोबाइलच्या माध्यमातून भोळ्याभाबड्या लोकांना गंडविले जात आहे. सोशल मीडिया तसेच विविध प्रकारच्या लिंकच्या माध्यमातूनही बँकेतील रक्कम हडपल्याच्या तक्रारी आहेत. या पार्श्वभूमीवर मोबाइलचा गैरवापर होणार नाही, याकडे प्रत्येकाने लक्ष देणे अत्यावश्यक झाले आहे.

- अजयकुमार वाढवे, सहायक पोलीस निरीक्षक