शेतकऱ्यांनो, सोयाबीन पेरणीची घाई करू नका !

कृषी विद्यापीठाच्या निर्देशानुसार बियाणे उगवणीसाठी जमिनीमध्ये पुरेसा ओलावा असणे गरजेचे आहे. त्यासाठी सरासरी ८० ते १०० मिलिमीटर पाऊस होणे आवश्यक आहे. यापेक्षा कमी पाऊस पडल्यास आणि शेतकऱ्यांनी पेरणीची घाई केल्यास पुरेशा प्रमाणात ओलावा नसल्याने जमिनीच्या उष्णतेमुळे बियाणे अतिशय कमी प्रमाणात अंकुरते व बियाणे जळण्याची शक्यतादेखील अधिक असते. त्यामुळे शेतकऱ्यांवर दुबार बियाणे पेरण्याची वेळ येऊ शकते. यामध्ये पैसे आणि वेळ दोन्हीचा अपव्यय होऊ शकतो. त्याचा विपरीत परिणाम होऊन उत्पादनात घट होऊ शकते. त्यामुळे सध्या पेरणीची घाई करू नका, असे आवाहन तोटावार यांनी केले आहे.

.................

बाॅक्स :

बियाण्याची उगवण क्षमता तपासा; बीजप्रक्रिया करा

शेतकऱ्यांनी पेरणी करताना बियाण्याची उगवण क्षमता तपासणे तसेच बीजप्रक्रिया करणे अत्यंत महत्त्वाचे आहे. पारंपरिक पेरणी पद्धतीला फाटा देऊन आधुनिक पद्धतीचा पेरणीत अवलंब करावा. पेरणी करताना बी. बी. एफ. यंत्राचा वापरा करावा, जेणेकरून बियाणे योग्य खोलीवर आणि अंतरावर पडते. त्यामुळे एकसमान उगवण होईल. पिकास पावसाचे योग्य पाणी मिळते. तसेच कमी पाण्यात पीक तग धरून राहाते, असे जिल्हा अधीक्षक, कृषी अधिकारी शंकर तोटावार यांनी सांगितले.