पीक विमा योजनेकडे शेतकऱ्यांनी फिरवली पाठ!

प्रशासनाच्या आवाहनाला प्रतिसाद मिळेना : विमा रक्कम भरण्याची अंतिम मुदत ३१ जुलै

लोकमत न्यूज नेटवर्क
वाशिम : खरीप हंगाम २०१७ साठी प्रधानमंत्री पीक विमा योजना लागू करण्यात आली आहे. या योजनेमुळे जिल्ह्यातील नऊ पिकांना पेरणीपासून ते काढणीपर्यंत विमा संरक्षण मिळणार आहे. असे असले तरी पावसाअभावी अंकुरलेली पिके कोमेजण्याच्या मार्गावर असून दुबार, तिबार पेरणीचे संकटही ‘आ’ वासून उभे असल्याने शेतकऱ्यांनी पीक विमा योजनेकडे सपशेल पाठ फिरवल्याची माहिती सूत्रांनी दिली.
सोयाबीन, कापूस, तूर, मुग, उडीद व खरीप ज्वारी पिकाचा प्रधानमंत्री पीक विमा योजनेत समावेश आहे. तसेच भात पिकासाठी वाशिम, रिसोड व मालेगाव तालुक्याचा समावेश असून भुईमुग पिकासाठी मालेगाव, कारंजा व तीळ पिकासाठी वाशिम, मानोरा, कारंजा तालुक्याचा समावेश करण्यात आला आहे. अधिसूचित क्षेत्रातील अधिसूचित पिके घेणारे कुळाने अगर भाडेपट्ट्याने जमीन करणाऱ्या शेतकऱ्यांसह सर्व शेतकरी या योजनेसाठी पात्र आहेत.
शेतकऱ्यांवरील विम्याच्या हप्त्याचा भार कमी करण्यासाठी शेतकऱ्यांनी भरावयाचा विमा हप्ता हा खरीप हंगामासाठी २ टक्के, रब्बी हंगामासाठी १.५ टक्के व नगदी पिकांसाठी ५ टक्के मर्यादित ठेवण्यात आला आहे. योजनेतील विमा उतरविलेल्या पिकांसाठी जोखिमस्तर ७० टक्के असा निश्चित करण्यात आला आहे. तसेच अधिसुचित क्षेत्रातील अधिसुचित पिकांचे उंबरठा उत्पन्न मागील ७ वर्षांचे सरासरी उत्पन्न गुणीला त्या पिकाचा जोखिमस्तर विचारात घेवून निश्चित केले जाणार आहे, असे प्रशासनाने यापुर्वी अनेकवेळा जाहीर केले. शेतकऱ्यांनी आपले विमा प्रस्ताव बँकेकडे सादर करण्याची अंतिम मुदत ३१ जुलै २०१७ पर्यंत आहे.
प्रस्तावासोबत सातबारा, ८ अ उतारा, पिक पाहणी झाली असल्यास पेरणीबाबतचा तलाठ्याचा दाखला जोडणे आवश्यक आहे. तसेच शेतकऱ्यांचे संबंधित बँकेत खाते असणे आवश्यक असल्याचे प्रशासनाने कळविले आहे. असे असतानाही शेतकऱ्यांनी पीक विमा योजनेकडे पाठ फिरवली असून या योजनेला कुठलाच प्रतिसाद मिळत नसल्याची माहिती कृषी विभागातील अधिकृत सूत्रांनी दिली आहे.

भाताचे उत्पादन नसताना पीक विमा योजनेत समावेश
जिल्ह्यात अधिकांश शेतकरी पारंपरिक पिकांचे उत्पादन घेतात. त्यात प्रामुख्याने सोयाबिन, तूर, मुग, उडिद, कापूस, ज्वारी, भूईमुग या पिकांचा समावेश होतो. मात्र, अधिक प्रमाणात पाणीच मिळत नसल्याने भात या पिकाचे उत्पादन जिल्ह्यात कुठेही घेतले जात नाही. असे असताना प्रधानमंत्री पीक विमा योजनेत वाशिम, रिसोड आणि मालेगाव तालुक्यांचा भात या पिकामध्ये समावेश करण्यात आलेला आहे. याशिवाय तीळाचेही उत्पन्न फारसे घेतले जात नसताना हे पीकही योजनेत समाविष्ट आहे.