मानोऱ्यात सर्वाधिक तर वाशिम तालुक्यातील प्रकल्पांत सर्वांत कमी जलसाठा!

वाशिम : गत १० दिवसांपासून कमी-अधिक प्रमाणात पाऊस बरसत असल्याने प्रकल्पांतील जलसाठ्यांतही वाढ होत आहे. मानोरा तालुक्यातील २५ प्रकल्पांत सर्वाधिक सरासरी ६५ टक्के तर वाशिम तालुक्यातील ३६ प्रकल्पांत सर्वांत कमी ११ टक्के जलसाठा झाला आहे.

यंदा जूनच्या अखेरीस आणि जुलै महिन्याच्या सुरुवातीला पावसाने दडी मारल्याने शेतकऱ्यांची चिंता वाढली होती. दुसरीकडे प्रकल्पातदेखील समाधानकारक जलसाठा नव्हता. गत १० दिवसांपासून जिल्ह्यात कमी-अधिक प्रमाणात संततधार पाऊस पडत आहे. त्यामुळे प्रकल्पांतील जलसाठ्यांतही वाढ होत असल्याचे दिसून येते. जिल्ह्यात पाटबंधारे विभागांतर्गत तीन मध्यम आणि १३४ लघू प्रकल्प असे एकूण १३७ प्रकल्प आहेत. सर्वाधिक प्रकल्प वाशिम तालुक्यात ३७ तर सर्वांत कमी प्रकल्प मंगरूळपीर तालुक्यात १५ आहेत. १३४ लघू प्रकल्पांत सरासरी ३७.०७ टक्के जलसाठा झाला तर तीन मध्यम प्रकल्पांत सरासरी ५३.०३ टक्के जलसाठा झाला आहे. वाशिम तालुक्यातील ३६ लघू प्रकल्पांत सरासरी ११.८४ टक्के तर मानोरा तालुक्यातील २५ प्रकल्पांत सरासरी ६५.०८ टक्के जलसाठा झाला आहे. रिसोड व वाशिम तालुक्यातील प्रकल्प अजून तहानलेलेच असल्याचे दिसून येते. प्रकल्प परिसरात दमदार पाऊस झाला नसल्याने या दोन्ही तालुक्यांतील प्रकल्पांत सरासरी २० टक्क्यांपेक्षा कमी जलसाठा आहे.

००००

असा आहे लघू प्रकल्पांतील जलसाठा

तालुकाप्रकल्प टक्केवारी

वाशिम ३६ ११.८४

मालेगाव २३ ४९.७०

रिसोड १९ १८.६५

मंगरूळपीर १५ ४८.१७

मानोरा २५ ६५.०८

कारंजा १६ ४९.८५

एकूण १३४ ३७.०७

०००

मध्यम प्रकल्पांतील जलसाठा

एकबुर्जी ६७.७५

सोनल ४२.०८

अडान ५३.१६

०००

बॉक्स

वाशिमकर निश्चिंत

वाशिम शहरात पाणीपुरवठा करणाऱ्या एकबुर्जी या मध्यम प्रकल्पांत सद्य:स्थितीत ६७.७५ टक्के जलसाठा झाला आहे. पावसाची रिपरिप सुरू असल्याने लवकरच हा प्रकल्प ओव्हरफ्लो होण्याचा अंदाज वर्तविण्यात येत आहे. हा प्रकल्प १०० टक्के भरला तर उन्हाळ्यापर्यंत शहरवासीयांना फारशी पाणीटंचाई जाणवत नाही.

०००००००००००